Հարությունյանի ու Վարդանյանի ջրերը մի առվով չեն հոսում. ի՞նչ զարգացումներ կլինեն Արցախում

Արցախի նախագահ Արայիկ Հարությունյանի կողմից հրապարակ բերված սահմանադրական փոփոխությունների նախագիծը տեղի քաղաքական ուժերը ոչ միանշանակ են ընդունել: Հարությունյանը, հետ կանգնելով մայր օրենքի ամբողջական փոփոխությունից, դրա լոկ մեկ դրույթն է ցանկանում փոփոխել, ինչը նախագահի հրաժարականի կամ պաշտոնավարելու անհնարինությունից բխող հետեւանքներին է վերաբերում: Պարզ ասած՝ այն հանգամանքին, որ երկիրն առանց նախագահի մնալու պարագայում կառավարող մյուս օղակներն իմանան՝ քայլերի ի՛նչ հաջորդականությամբ առաջնորդվել:

«Ազգ»-ն ավելի վաղ գրել էր, որ Սահամանդրությունը փոփոխելու գաղափար Արցախի քաղաքական ուժերից շատերի մոտ անմիջապես 44-օրյա պատերազմից հետո է առաջացել: Այդ մասին, ի դեպ, Արցախի թե՛ իշխանական, թե՛ ընդդիմադիր ուժերը բազմիցս են խոսել՝ բաց ու հրապարակավ: Պատերազմող երկիրը, շեշտել են, ամեն վայրկյան ծանր ու լուրջ որոշումներ ընդունելու խնդրի առաջ կարող է կանգնել, հետ եւաբար՝ կառավարման կոլեկտիվ, ու ոչ թե ուղղաձիգ մոդել պետք է ունենալ:

Մեր տեղեկություններով՝ Արայիկ Հարությունյանն, ի սկզբանե, կարծես թե դեմ չի եղել գաղափարին, ընդունել է քաղաքական ուժերի մտահոգությունը, ավելին՝ 2022-ի հունվարին սահամանդրական փոփոխությունների համար հանձնախումբ ձեւավորելու հրաման է տվել: Խոսքերից ու հրամաններից անդին սակայն՝ սահմանադրական ամբողջական փոփոխություններ այդպես էլ տեղի չեն ունենում, ու Հարությունյանը, փաստորեն, այժմ էլ ոչ թե ամբողջական Սահմանադրությունը, այլ դրա սոսկ մեկ դրույթն է ցանկանում փոփոխել:

Արցախյան մեր աղբյուրները հայտնում են, որ անգամ այս մեկ դրույթի փոփոխությունը հարցական է՝ կյանքի կկոչվի՞, թե՞ ոչ: Նրանք նախագահ Հարությունյանի քայլերի տրամաբանությունից գլուխ չեն հանում: Թեեւ նշում են, որ առաջարկվող փոփոխությունն իսկապես անհրաժեշտ է, բայց եւ չեն բացառում՝ որոշ պահի նախագահն այս նախաձեռնությունը  եւս կարող է վիժեցնել:

Ստեփանակերտից մեզ փոխանցում են նաեւ, որ արցախյան քաղաքական դաշտում խիստ լարված մթնոլորտ է, անհասկանալի է՝ ով ում հետ ինչ խաղի մեջ է: Բացի այդ՝ ակնհայտ է նաեւ, որ նախագահ Հարությունյանի ու պետական նախարար Ռուբեն Վարդանյանի ջրերը, մեղմ ասած, նույն առվով չեն հոսում, ու չի բացառվում, որ Արցախի կառավարության կազմում առաջիկայում նոր փոփոխություններ լինեն:

ՍԵՎԱԿ ՎԱՐԴՈՒՄՅԱՆ