Առաքելական Սուրբ Եկեղեցու հանդեպ տարիներ շարունակ տարվող տարաբնույթ պայքարն ու սադրիչ գործողությունները վերջին շրջանում թեւակոխել են առավել բացահայտ ու ագրեսիվ փուլ: Բանն ընդհուպ նրան է հասել, որ խափանվեց տարիներ շարունակ Հանրային հեռուստաալիքով Ամենայն Հայոց Հայրապետի՝ ամանորյա ուղերձի հեռարձակման ավանդույթը: Ի աջակցություն եկեղեցու՝ երեկ՝ հունվարի 17-ին, մի խումբ երիտասարդներ Երեւանից երթով Էջմիածին էին հասել: Մայր Աթոռի բակում նրանց դիմավորեց Էջմիածնի դիվանապետ Արշակ արքեպիսկոպոս Խաչատրյանը: «Բարի՛ եք եկել Մայր Աթոռ Սուրբ Էջմիածին, ուխտնե՛րդ ի կատար: Շատ տպավորված եմ այս քանակությամբ երիտասարդների ներկայությամբ: Եկեղեցին, իսկապես, փորձություններ շատ է հաղթահարել, ու մեր ժամանակներն էլ այդպիսին են, երբ փորձություններով պիտի անցնենք: Եկեղեցին ամենքս ենք. նրանք, որ մկրտվել են սուրբ ավազանում եւ ամենօրյա մասնակցություն են բերում եկեղեցու առաքելություն-գործունեությանը: Լինել եկեղեցու կողքին նշանակում է՝ լինել ինքդ քո կողքին, պաշտպանել ինքնությունդ, ապրելու իրավունքդ, արժանապատվությունդ եւ քար ավելացնել ապագայի կառուցվող շենքիդ»,- երիտասարդներին դիմելով՝ ասաց սրբազանը:
Երիտասարդներից Արմեն Մկրտչյանի դիտարկմամբ՝ ստալինյան բռնաճնշումներից հետո եզակի դեպք է, երբ ամեն օր ականատես ենք լինում եկեղեցու դեմ ոտնձգությունների. «Որդիական խոնարհումով ենք եկել եւ պատրաստ ենք ցանկացած պայքարում առաջամարտիկ լինել: Մեր այս քայլով ցանկանում ենք ցույց տալ, որ եկեղեցին ուժեղ է իր հավատացյալներով, եւ որքան էլ փորձեն ցածրացնել, նսեմացնել Հայ Առաքելական եկեղեցու դերը, մեր կարծիքով, ի վերջո միավորումը եւ համայն հայության հաղթանակը եկեղեցու շնորհիվ է լինելու»:
Առաքելական եկեղեցու դեմ հնչած եւ վերջին օրերին կրկին ակտիվորեն հնչող հայտարարություններն Արմեն Մկրտչյանը դիտարկում է պետական հակաքարոզչության տրամաբանության մեջ: Դրանք, իր կարծիքով, իշխանական կենտրոնից են թելադրվում եւ կառավարվում: Թե իշխանության ինչի՞ն է դա պետք, երիտասարդը հորդորում է իշխանությանը հարցնել:
«Նպատակը Գարեգին Բ-ի պաշտոնանկությո՞ւնն է, թե՞ Եկեղեցու հիմքերի խարխլումը»,- լրագրողների հարցին Մկրտչյանը հարցով է արձագանքում, «Իսկ Գարեգին երկրորդը Հայ եկեղեցու պատմություն առարկայի հետ ի՞նչ կապ ունի: Եկեղեցու հանդեպ տարվող այս հակաքարոզչությունն ինչի՞ ենք անձնավորում: Գործընթաց է տարվում՝ Հայ Առաքելական եկեղեցին մյուս կրոնական, աղանդավորական կազմակերպություններին հավասարեցնելու: Ճիշտ պայքար չտանելու դեպքում՝ դրան ականատես կլինենք»:
Առաքելական եկեղեցու դեմ պայքարի սկիզբը, բանախոսի կարծիքով, դրվեց Հայ եկեղեցու պատմություն առարկան դպրոցներից հանելուց եւ շարունակվում է: «Ի դեմս այս իշխանության, մենք գործ ունենք ազգը եւ պետությունն իրար դեմ հակադրող խմբի հետ: Իրականում, պետությունը ազգի հարատեւման համար գործիք է: Ազգային պետության վերացման խնդիր է դրված եւ փրկությունը գալու է Եկեղեցուց ու Եկեղեցու շուրջ համախմբումից»,- ասաց Մկրտչյանը:
Նա նաեւ հիշեցնում է, որ անկախությունից ի վեր առաջին անգամ Հայաստանի ղեկավարի ամանորյա ուղերձում ազգի, պետության, պետականության, բանակի մասին ուղերձներ չեղան, փոխարենը՝ թոշակներ, աշխատավարձեր, հարկեր, տնտեսական աճ եւ այլն:
Ինչ վերաբերում է Վեհափառի կողմից Նիկոլ Փաշինյանի հրաժարականի հորդորին, որը էլ ավելի սրեց հարաբերությունները, եւ ինչպես իշխանական այրերն են բնութագրում՝ եկեղեցին քաղաքականությանն է խառնվում, բանախոսը շեշտեց. «Եկեղեցին այս ամբողջ ընթացքում առանց այն էլ բավական պասիվ է եղել, բայց, վստահ եմ, իր վրա պետք է համախմբողի դեր վերցնի: Մենք ականատես եղանք Արցախի լուռ հանձնմանը եւ ինստիտուտներից, միայն եկեղեցին էր, որ բացահայտ կերպով դեմ արտահայտվեց: Կարծում եմ, լարվածությունը նաեւ այդտեղից է գալիս: Կաթողիկոսի դեմ արշավը եւ հարձակումները սկսվել էին դեռ 2018-ին, եւ եթե ժամանակին հավատացյալներով ճիշտ արձագանքեինք, այսօր եկեղեցին գուցե այս օրին չհասներ»:
ՍԵՎԱԿ ՎԱՐԴՈՒՄՅԱՆ
