Երբ ՔՊ-ն իշխանության եկավ, ԱԺ իշխանական խմբակցության անդամ Վաղարշակ Հակոբյանի հետ հարցազրույց արեցինք համատիրությունների վերաբերյալ, մենք ուզում էինք ստանալ այն հարցի պատասխանը, թե ինչպես պետք է լուծվի մեծ մասամբ չմատուցած ծառայությունների համար առավելաբար սովետական ԺԵԿ-երի եւ մութուցուրտ տարիներին չաշխատող նորաստեղծ համատիրությունների սարքովի պարտքերի հարցը, որոնք տարիների ընթացքում մի լավ կլորացված- դրված են բազմաբնակարան շենքերի`վերջին տարիներին բարեխիղճ վճարող բնակիչների ուսերին: Երբ վերջիններիս համատիրությունից մի տեղեկանք է պետք լինում, կամ բնակարանների առքուվաճառք է կատարվում` մի կլորիկ գումարի պարտք են դեմ տալիս քաղաքացիներին այն դեպքում, երբ քաղաքացին երկու տասնյակ տարի կարող է եւ բարեխիղճ մուծած լինել համատիրության սպասարկման վարձը:
Այդ մասին ութ տարի առաջ հարցրել էինք Աժ իշխանական խմբակցության պատգամավոր Վաղարշակ Հակոբյանին, որն այն ժամանակ խնդրի լուծման օրենսդրական եղանակ էր առաջարկում: Ութ տարին անցավ, ո՛չ հիմնավոր կարգավորման օրենսդրական փաթեթ բերվեց ԱԺ, ո՛չ այլ եղանակներով խնդիրը լուծվեց, տասնամյակով համատիրություններին բարեխիղճ վճարող քաղաքացուն էլ շարունակոււմ են դեմ տալ մութուցուրտ տարիներին համատիրություննների (նույնիսկ այն ժամանակվա ԺԵԿ-երի) չմատուցած ծառայությունների դիմաց ինչ-որ կլորիկ պարտքեր: Ութ տարի անց հարցը կրկին վերաուղղում ենք Վաղարշակ Հակոբյանին, որն այն ժամանակ ասում էր, որ իր քաղաքական ուժը պետք է լուծի այդ խնդիրը` համատիրութունների մասին օրենքը փոխելով, մի քանի տարվա մուծումներից ավելի հին պարտքերը չեղարկելով: Համատիրությունները, այս մտադրությանը երեւի հակակշռելով, խորամանկ քայլերի են դիմել, ու վերջին տարիներին անընդմեջ վճարվող սպասարկման վարձերն արտացոլել են հին տարիների վրա, որպես այդ հին պարտքերի հատուցում, այդպիսով չվճարված թողնելով վերջին տարիների դիմաց: Այդ հարցը այդպես էլ չի կարգավորվել, պարտքերը համատիրությունների ֆոկուսնիկության շնորհիվ կլորիկ նստած են մեր հաշիվներում որպես պարտք, ու հավանաբար քաղաքային իշխանություններն էլ հատուկ այս առումով որոշումներ չեն կայացնում, որովհետեւ քաղացիների հաշվին լրացուցիչ փողի աղբյուր ունեն, այդ աղբյուրից իրենց կզրկեն բա:
Համատիրությունների վերաբերյալ օրենք բերելու եւ այս խնդիրը լուծելու խոստում տված Վաղարշակ Հակոբյանին ութ տարի հետո կրկին հիշեցնելով խնդիրը` հետաքրքրվեցինք, թե ինչպես է ի վերջո լուծվելու այն, որպեսզի համատիրությունները, անցյալում չկատարված ծառայությունների դիմաց (համատիրությունները հիմա աշխատում են մեծ մասամբ, ու դրա համար էլ վճարում ենք հիմա) քաղաքացիներից չպահանջեն անարդար այս վճարումները: Փոխանցենք մեր կարճ երկխոսությունը, որի աուդիո տարբերակը տողերիս հեղինակի յութուբյան էջում տեղադրված է.
Վ.Հ.-Ես անկեղծորեն ուզում եմ ասել, որ տվյալ հարցը գտնվում է կառավարության տիրույթում, եւ խնդրում եմ, որ մեր քաղաքացիները դիմեն (ես եւս դիմելու եմ, նաեւ ձեր մտահոգություններն ու հորդորը կփոխանցեմ) երկու պատկան մարմնի. Առաջին դա քաղաքաշինության կոմիտեն է, երկրորդ երեւանի քաղաքապետարանը:
–Բայց կոնկրետ ի՞նչ անեն, երբ նրանցից այդ պարտքը պահանջում են:
Վ.Հ.-Որքան հիշում եմ` վերջին հինգ տարվանը պետք է վերաբերեր այդ պարտքը:
–Գիտեք, իրենք խորամանկություն են արել, որ երբ մարդիկ վճարել են, համատիրություններն այդ վճարն ձեւակերպել են են որպես հին պարտքի մարում, եւ վերջին տարիները չեն արտացոլում այդ մարումները: Մինչդեռ մարդիկ ամեն ամիս վճարում են առկա պարտքն արդեն շատ տարիներ` համաձայն չլինելով անցյալում չկատարված աշխատանքի համար վճարել:
Վ.Հ.-Անխոս, համատիրությունների ոլորտը պետք է բարեփոխվի: Չնայած որ համատիրությունների պատախանատուներն իրենց չափով այս տարիներին շատ կարեւոր աշխատանք են արել` չեմ ուզում որեւէ մեկի կատարած աշխատանքը նսեմացնել, բայց մեր բնակչության շահերից է բխում, որ այդ հարցն ամբողջությամբ պետք է վերափոխվի, եւ ես անպայման դրանով զբաղվելու եմ:
-Բա ութ տարում անեիք` ամեն ինչ գցում էինք նախկին իշխանությունների վրա, ինչո՞ւ չեք արել:
Վ.Հ.-Ճիշտ եք, ես բերել եմ օրենսդրական նախաձեռնություն, մի կտորով հարցը լուծվել է այն ժամանակ, բայց դրանից հետո փոփոխությունը մինչեւ վերջ չի գնացել վերջնական հանգրվանին: Ես անպայման խոսակցութուն կունենամ քաղաքաշինության կոմիտեի ղեկավարի հետ:
ՄԱՐԻԵՏԱ ԽԱՉԱՏՐՅԱՆ
