Վերնագրի այս ճշգրիտ՝ Հայաստանում ցեղասպանությունը կանխարգելող բովանդակությամբ «Քրիստոնեական միջազգային համերաշխություն» (Christian Solidarity International) կազմակերպությունը մամլո հաղորդագրություն է տարածել՝ «կոչ անելով ձայն բարձրացնել վտանգված հայերի պաշտպանության համար»: «Ղարաբաղի լեռներում աշխարհի հնագույն քրիստոնեական հանրությանը սպառնում է նպատակադրված բնաջնջում», ձեւակերպել է CSI-ն՝ հիշեցնելով դեկտեմբերի 12-ից ի վեր Բերձորի շրջափակման մասին: Ադրբեջանական սպառնալիքը բացահայտող տեղեկատվական սեղմագիրը կարդալուց հետո, դժվար թե բանական էակն անտարբեր մնա, այնպես որ հուսանք լռությունը շատերը կխախտեն՝ հանրագրով դիմելով իրենց կառավարություններին:
Գերմանիայում գործող «Վտանգված ազգերի ընկերակցությունը» Արցախին սպառնացող վտանգը կանխելու համար հունիսի 1-ին Քիշնեւում ներկա Շոլցին էր ուղղում իր կոչը՝ Գերմանիան պիտի կանգնեցնի Ադրբեջանին: Եթե Հայաստանը Արցախը տա Ադրբեջանին, տեղի հայությանը կսպառնա զանգվածային բռնությունն ու տեղահանումը: Գերմանիան եւ ԵՄ- ն չպետք է արտոնեն դա»: « Արցախի բնակչության վիճակը մեզ խիստ մտահոգում է: Խոսքը երկու պետությունների՝ Հայաստանի եւ Ադրբեջանի հակամարտության մասին չէ, այլ՝ Արցախի եւ նրա բնակիչների կարգավիճակի: Նրանց ինքնորոշման իրավունքը տասնամյակներով ոտնահարված է: Հայաստանի՝ Արցախի տարածքից հրաժարվելու առաջարկն իրավաչափ չէ»: «Գերմանիան իրավունք չունի անգործ դիտորդ լինելու, քանզի պատմական առանձնահատուկ պատասխանատվություն է կրում: Գերմանիան արդեն մի անգամ արտոնել է հայերի հանդեպ ցեղասպանություն իրագործել, ոչինչ չի ձեռնարկել: Այժմ դա կրկնելու իրավունք չունի», նշում է «Վտանգված ազգերի ընկերակցության» ներկայացուցիչ Զառա Ռայնքեն (Sarah Reinke):
ԱՆԱՀԻՏ ՀՈՎՍԵՓՅԱՆ
Գերմանիա
