«Դավար (Իսրայելի երկրի աշխատավորների խոսքը)» առցանց թերթում մայիսի 18-ին լույս է տեսել Յարոն Վեյսի «Երուսաղեմի օրը ես դարձյալ կանգնում եմ հայկական վանքում՝ սպասելով թքոցների. որտե՞ղ է ոստիկանությունը» հոդվածը: Հեղինակը քննադատում է Երուսաղեմի օրվա դրոշների ավանդական երթը, որը, ըստ նրա, այլեւս քաղաքի միասնության խորհրդանիշ չէ, այլ դարձել է լարվածության ու բաժանման աղբյուր: Նա նշում է, որ այդ օրը Հին քաղաքի մուսուլմանական եւ քրիստոնեական թաղամասերում բազմաթիվ խանութներ փակվում են՝ սպասվող բախումների ու ոտնձգությունների պատճառով: Վեյսը պատմում է, որ ամեն տարի կամավորների հետ կանգնում է Հայոց պատրիարքարանի փողոցում՝ հայկական վանքի մուտքի մոտ, որպեսզի պաշտպանական ներկայություն ապահովի: Ըստ «Կրոնի ազատության տվյալների կենտրոնի» հաշվետվությունների, Հին քաղաքում քրիստոնյաների նկատմամբ արձանագրված ոտնձգությունների մոտ երկու երրորդը տեղի է ունենում հենց այդ փողոցում: Չնայած այս փաստերին, ոստիկանությունը բավարար ուժեր չի տեղակայում հայկական վանքի դիմաց՝ երթի ընթացքում կանխելու միջադեպերը:
Հեղինակը նկարագրում է, թե ինչպես կամավորները տեսախցիկներով արձանագրում են թքելու դեպքերը եւ նյութերը փոխանցում ոստիկանությանը, թեեւ կասկածում է, որ շատ գործեր փակվում են առանց արդյունքի: Նրա կարծիքով, եթե տեղում ոստիկաններ լինեին, հնարավոր կլիներ անմիջապես ձերբակալել իրավախախտներին: Հոդվածը շեշտում է, որ քրիստոնյաների նկատմամբ նման վերաբերմունքը ոչ միայն իրավական, այլեւ խոր բարոյական ճգնաժամ է եւ վնասում է Իսրայելի միջազգային հեղինակությանը: Հեղինակը նաեւ զգուշացնում է, որ նման երեւույթներն աշխարհում նպաստում են հակահրեական տրամադրությունների եւ թուլացնում հրեաների բարոյական դիրքերը:
Վերջում նա առաջարկում է փոխել դրոշների երթուղին, որպեսզի այն չանցնի մուսուլմանական, հայկական եւ այլ քրիստոնեական թաղամասերով, իսկ եթե երթուղին մնա նույնը, ապա ապահովել ոստիկանական ուժերի մեծաքանակ ներկայություն:
Յարոն Վեյսն այն քչաթիվ իսրայելցիներից է, որ հետեւողականորեն պաշտպանում է հայերի դատը՝ թե Հայաստանում, թե Իսրայելում: Տարիներ շարունակ նա իսրայելական խմբեր է բերել Հայաստան եւ Արցախ, կազմակերպել հայանպաստ միջոցառումներ, գրել հոդվածներ: Նրա հետ մեր հարցազրույցը («Եկե՛ք Արցախ» վերնագրով) տե՛ս «Ազգ»ի 2022 թ. մայիսի 6-ի համարում:
Ա. Բ.
