Ժամանակներն ու մենք՝ Կ. Պոլսի «Ժամանակ» օրաթերթի գլխավոր խմբագրի դիտակետից
Կ.Պոլսում լույս տեսնող «Ժամանակ» օրաթերթը 116 տարեկան է:
Այն ոչ միայն Սփյուռքում, այլեւս առհասարակ հայկական աշխարհում հայալեզու միակ պարբերականն է, որ 1908 թվականից անընդմեջ հրատարակվում է, միեւնույն ժամանակ ազգային փոքրամասնությունների շրջանում ամենահին պարբերականներից է:
«Ժամանակ» օրաթերթը Սարգիս եւ Միսաք Գոչունյան եղբայրներն են հիմնադրել: Այն սերնդից սերունդ, ժառանգաբար պապից որդուն, հետո թոռանն ու այսպես շարունակ անցնող-պահպանվող պարբերական է, որը արեւմտահայերն է հրատարակվում՝ դասական ուղղագրությամբ:
Գոչունյանների չորրորդ սերունդն է թերթը խմբագրում ու հրատարակում:
«116 տարի Թուրքիայում հրատարակվելը չի կարելի բացատրել միայն Գոչունյան տոհմի համառությամբ: Բալկաններից մինչեւ Կովկաս, մինչեւ Եգիպտոս «Ժամանակը» կանոնավոր տարածում ու սպառում է ունեցել: Հետո, աստիճանաբար աշխարհագրությունը փոքրացել է, որովհետեւ այդ տարածքները զրկվել են հայերից: Եվ թերթն աստիճանաբար սկսել է սահմանափակվել Կ. Պոլսով:
Լրատվամիջոց լինելոով՝ այն ազգային ինքնությունը պահպանելու, հայապահպանության լծակ լինելու առաքելություն է ունեցել: Ընթերցողները հայ իրականության մասին տեղեկություն ստանալուց բացի, նաեւ իրենց մայրենի լեզվի հետ ամենօրյա կապն են պահել: Հայ ընտանիքները ցանկացել են «Ժամանակ» օրաթերթն իրենց օջախներում ունենալ ու փոխանցել սերնդեսերունդ:
Ժամանակները փոխվել են, այսօր տպագիր թերթ պահելը բավականին բարդ է: Տպագիր թերթ հիմա առաջվա պես հաճախ չեն կարդում, այն սպառել է իրեն, բայց շարունակում է հասարակական կարծիքի ձեւավորման վրա ազդեցություն ունենալ»,-«Ազգ»-ի հետ զրույցում ասաց «Ժամանակ» օրաթերթի գլխավոր խմբագիր Արա Գոչունյանը:
Նրա հետ ծավալուն հարցազրույցն առաջիկայում կներկայացնենք 2 մասով՝ հոդվածով եւ Аzg.am կայքում տեղադրված տեսանյութերով:
