Նոյեմբերի 2-ին տեղի ունեցավ երկար սպասված իրադարձություն. աշխարհի ամենաազդեցիկ խումբը թողարկեց «Now And Then» երգը, ինչին հաջորդեց օսկարակիր ռեժիսոր Փիթեր Ջեքսոնի նկարահանած տեսահոլովակի պրեմիերան:
Կոմպոզիցիայի դեմո-տարբերակը 1977 թ. ձայնագրել էր Ջոն Լենոնը, իսկ 1994 թ. այն բիթլի այրի Յոկո Օնոն փոխանցեց խմբի մյուս անդամներին: Երեք բիթլները նվագակցեցին ձայնագրությանը, սակայն քանի որ դրա որակն ի սկզբանե անբավարար էր, հետաձգեցին երգի թողարկումը: Եվ ահա, ներկայիս տեխնոլոգիաները վերջապես թույլ տվեցին ազատվել ձայնագրությանն ուղեկցող ավելորդ աղմուկից ու առանձնացնել Ջոնի ձայնը, ինչից հետո Փոլ Մաքքարթնին ու Ռինգո Սթարը ավարտեցին աշխատանքը՝ 1995 թ. Ջորջ Հարիսոնի կատարած կիթառային նվագին ավելացնելով բաս կիթառի, սլայդ-կիթառի, հարվածայինների եւ բեք-վոկալի պարտիաները: Երգի համապրոդյուսեր Ջայլզ Մարթինը («Բիթլզի» պրոդյուսեր Ջորջ Մարթինի որդին) նշում է, որ դրանում օգտագործել է խմբի հին ձայնագրություններից վերցված վոկալ հարմոնիաները: Հայտնի է նաեւ, որ հրավիրյալ նվագախմբի երաժիշտները մասնակցել են ձայնագրությանը, չիմանալով, թե ո՞ր խմբի երգն են ձայնագրում:
Փոլ Մաքքարթնին ենթադրում է, որ արդյունքը Ջոնին դուր կգար: Ըստ Փոլի՝ վերականգնումից հետո Ջոնի ձայնը «բյուրեղի պես մաքուր է հնչում», իսկ Ռինգոն հավելում է. «Ասես Ջոնը մեզ հետ լինի»: Ըստ լուրերի՝ երգի ձայներիզի տուփին Ջոնը գրել է՝ «Փոլի համար», իսկ դրա տեքստում այսպիսի բառեր կան՝ «Հիմա եւ այնժամ կարոտում եմ քեզ»:
Երգը ներկայացվում է որպես ««Բիթլզի» վերջին ձայնագրություն», սակայն «Բիլբորդի» առաջին դեմքերն իրենց կասկածն են հայտնում. չէ՞ որ նման լեգենդար երաժիշտները չհրապարակված նյութերի անվերջանալի պաշար են ունենում:
Սինգլն արդեն բրիտանական չարթերի առաջին տեղում է. դրանով «Բիթլզը» սահմանել է բոլոր ժամանակների մի քանի ռեկորդներ (մասնավորապես՝ #1 հիթերի միջեւ ընկած ամենաերկար ժամանակահատվածի, ամենաշատ #1 հիթեր ունեցող խմբի եւ առաջին տեղը զբաղեցրած ամենահին խմբի): Երգը հայտնվել է նաեւ ամերիկյան «Բիլբորդի» չարթերի վերին տասնյակում:
ԱՇՈՏ ԳՐԻԳՈՐՅԱՆ
