ՀՀ ԳԱԱ ֆիզիկական հետազոտությունների ինստիտուտում մշակվել է Հոնգ-Օու-Մանդելի (ՀՕՄ) ինտերֆերենցի իրականացման նոր մեխանիզմ տարբեր ալիքի երկարության երկու անկախ ֆոտոնների համար: Այն հիմնված է պարամետրիկ փոխազդեցության վրա: Մեխանիզմը հնարավորություն է տալիս վերահսկելի կերպով տեղափոխել կոդավորված քվանտային տեղեկույթը հիբրիդային ցանցով, ինչպիսին է քվանտային ինտերնետը, որտեղ տարբեր նյութական հանգույցները գործում են տարբեր ռեզոնանսային հաճախություններով: ՀՕՄ երեւույթն անկախ է ֆոտոնների բեւեռացումից, ինչի շնորհիվ առաջարկվող մոդելը ճկուն է հիբրիդային քվանտային ցանցերում օգտագործելու համար:
Քվանտային ինտերնետը կապի ցանց է, որը թույլ է տալիս փոխանակել քվանտային ինֆորմացիան ցանցի հանգույցների միջեւ ՝ հիմնված քվանտային ֆիզիկայի օրենքների վրա: Այն ապահովում է աննախադեպ հնարավորություններ, որոնք ակնհայտորեն անհնար են միայն դասական տեղեկատվության օգտագործմամբ՝ ներառյալ բացարձակ անվտանգ հաղորդակցությունը:
Քվանտային ինտերնետի իրականացման հիմնական խնդիրները դեռեւս լուծված չեն: Քվանտային ցանցերում հաղորդակցությունն իրականացվում է ֆոտոնների միջոցով, որոնք գտնվում են որոշակի կոհերենտ վիճակներում: Երկրամերձ ցանցերում ֆոտոնները տարածվում են ալիքատարներով, որոնց հիմնական թերությունը դեկոհերենտությունն է, ինչը քայքայում է ֆոտոնների կոհերենտ վիճակը, հետեւաբար, աղավաղում հաղորդվող ինֆորմացիան: Մյուս կողմից, քվանտային ինտերնետի հանգույցները, որտեղ գրանցվում, ձեւափոխվում եւ վերարտադրվում է քվանտային ինֆորմացիան, պատրաստված են տարբեր նյութերից եւ աշխատում են տարբեր հաճախականությունների վրա: Հետեւաբար, հանգույցից հանգույց տարածվելիս ֆոտոնի հաճախականությունը համապա-տասխան ձեւով պիտի փոխակերպվի:
Գիտնականների կողմից առաջին անգամ տեսականորեն մշակվել է նոր մեխանիզմ՝ հիմնված հայտնի Հոնգ-Օու-Մանդելի (ՀՕՄ) ինտերֆերենցի վրա, որը թույլ է տալիս վերահսկելի կերպով տեղափոխել ինֆորմացիան քվանտային հիբրիդային ցանցով, ինչպիսին է քվանտային ինտերնետը: Մշակված մոդելը կարող է ծառայել որպես անհրաժեշտ շինանյութ ապագա քվանտային ցանցերի ստեղծման համար, որոնք հիմնված են քվանտային հիշողության տարասեռ կառուցվածքների վրա:
Աշխատանքն իրականացվել է ՀՀ կրթության, գիտության, մշակույթի եւ սպորտի նախարարության բարձրագույն կրթության եւ գիտության կոմիտեի աջակցությամբ:
ՍՏԵՓԱՆ ՊԱՊԻԿՅԱՆ
