Արաքս գետի հունից տարիներ ավազ է արդյունահանվել, որն օրենքով արգելված է, քանի որ Արաքսի հունը կարող է փոխվել ի վնաս մեզ՝ փոխելով նաեւ պետական սահմանը: Ընդերք օգտագործող կազմակերպությունները, որ Արաքսին մոտիկ տարածքից ավազ արդյունահանելու թույլտվություն ունեին, հաճախ խախտել են թույլտվության կետերը եւ մտել են Արաքսի հուն՝ Հայաստանի սահմանի փոփոխության ռիսկ ստեղծելով: Սա հնարավոր է եղել, քանի որ տեսչական մարմինները չեն կարողացել սահմանին մերձ վերահսկողական գործառույթ իրականացնել:
Ազգային ժողովում քննարկվում է մի օրինագիծ, որի ընդունման դեպքում ապրիլի մեկից արդեն գործելիք այդ օրենքով հնարավոր կլինի նվազագույնի հասցնել կամ անգամ ընդհանրապես կասեցնել Արաքսի հունից ապօրինի ավազարդյունահանման դեպքերը, քանի որ սահմանվում են մեծ տուգանքներ՝ խախտման դեպքերում, ինչպես նաեւ ընկերություններին առաջարկվում իրականացնել մի շարք տեխնիկական միջոցառումների համալիր, որի առկայությամբ խախտում անելը կդժվարանա: Մասնավորապես՝ ընդերքօգտագործող ընկերությունները պետք է տեղադրեն Ջի Պի Էս համակարգ, անգամ առաջարկ է հնչել տեսախցիկներով վերահսկող կենտրոնացված համակարգին միանալու մասին:
Ի դեպ՝ քննարկման ընթացքում հայտնի դարձավ, որ պատերազմի շրջանում Արաքսի ափամերձ գոտում գործունեություն ծավալող ընկերությունները թաքցրած են եղել իրենց տեխնիկան, որի կարիքը հաճախ է զգացվել պատերազմական գործողությունների ժամանակ ինչ-ինչ խնդիրներ լուծելիս: Տեսահսկման միասնական համակարգի միացման դեպքում դա հնարավոր չի լինի:
Մ.Խ.
