Արարատի մարզի Արաքսավան գյուղն արդեն ջուր է ստանում նոր խողովակաշարով: 2023 թվականի ամռանը սկսած աշխատանքները բնակավայրում մոտենում են ավարտին: «Վեոլիա Ջուր» ընկերության «Արտաշատ» շահագործման տեղամասը այս ամիսների ընթացքում ամբողջությամբ փոխեց գյուղը սնող ջրագիծն ու ներքին ցանցը՝ ընդհանուր 7350 գծամետր: Տեղադրվեցին 140 ջրաչափական դիտահորեր՝ ջրաչափերով, կառուցվեցին 6 բաժանարար հանգույցներ՝ 12 փականներով, որոնց միջոցով ցանցը դարձավ կառավարելի եւ վերահսկելի:
Արաքսավան գյուղը գտնվում է Հայաստանի Հանրապետության Արարատի մարզի Արտաշատի տարածաշրջանում, մարզկենտրոնից 7-8 կմ հյուսիս-արեւմուտք, բարձրությունը ծովի մակերեւույթից՝ 860 մ: Գյուղը հիմնադրվել է 1831 թվականին: Նախկինում կոչվել է Սաբունչի: Վերանվանվել է 1978 թվականի հունվարի 25-ին: Ըստ Հայաստանի 2011 թ. մարդահամարի արդյունքների՝ Արաքսավանի մշտական բնակչությունը կազմել է 732, առկա բնակչությունը՝ 690 մարդ: Ներկայումս բնակեցված է հայերով, որոնց նախնիների մի մասը 1828-1829 թթ. եկել է Խոյի եւ Սալմաստի գավառներից:
Գյուղն ունի 221 տնտեսություն: Գյուղում գործում են դպրոց, կապի հանգույց, բուժկետ, մանկապարտեզ, մշակույթի տուն: Համայնքի տնտեսության մասնագիտացման ճյուղը գյուղատնտեսությունն է: Գյուղատնտեսական նշանակության հողերը կազմում են շուրջ 377 հեկտար: Գյուղատնտեսական հողահանդակները ոռոգվում են: Համայնքի հողերը օգտագործվում են հիմնականում որպես վարելահող՝ զբաղեցնելով 234 հեկտար: Պտղատու եւ խաղողի այգիները փոքր տարածք են զբաղեցնում՝ 3,5 հեկտար:
Այժմ գյուղում ընթանում են վերջին մի քանի բաժանորդների համակարգին միացնելու աշխատանքները, որոնք կավարտվեն մոտ 10 օրից: Սակայն գյուղի 180 բաժանորդ արդեն ստանում է բարձր ճնշմամբ եւ որակյալ ջուր, ինչպես նաեւ կանխվել է վայրկյանում 4 լիտր ջրի կորուստ: 1980-ական թվականներից երբեւէ չվերակառուցված ջրամատակարարման ցանցի արդիականացումը Արաքսավանում ուրախությամբ են ընդունել:
ՍՏԵՓԱՆ ՊԱՊԻԿՅԱՆ
