Քաղաքական գործիչ, «Հանրապետություն» կուսակցության նախկին անդամ Սուրեն Սուրենյանցըդեռ նախորդ շաբաթ պետք է ազդարարեր փողոցային պայքար սկսելու մասին: Բայց Ռուսաստանում՝ Մոսկվայում, տեղի ունեցած ողբերգությունից հետո որոշել է՝ հարգել Հայաստանի ռազմավարական գործընկերոջ սուգն ու հավաքը տեղափոխել ապրիլի 6:
Վերջին մեկ տարում ակտիվացած «Դեմոկրատական այլընտրանք» կուսակցության նախագահը, որի խոսքերն ու ելույթները խիստ «պրոռուսական են», վստահ է՝ Փաշինյանին եւ նրա թիմին կարողանալու են հեռացնել: «Ինչպե՞ս». «Ազգ»-ը հետաքրքրվեց նրանից: «Ե՛վ փողոցով, ե՛ւ մյուս գործիքներով, որ բերելու են խորհրդարանական արտահերթ ընտրությունների: Եվ այդ ընտրություններին Փաշնյանը կա՛մ չի մասնակցելու, կա՛մ մասնակցելու է ոչ նախկին՝ 2021-ի արտահերթի կարգավիճակով: Այսինքն՝ այնպես չի լինելու, որ խորհրդարանում երկու անգամ չընտրվի, բայց կառավարչական լծակներն իր ձեռքում լինեն»,- մեր հարցին ի պատասխան ասաց կուսառաջնորդը:
– Որտեղի՞ց այդ վստահությունը, որ հաջողելու եք: 44-օրյա պատերազմից հետո առնվազն երկու անգամ ընդդիմությունը փողոց է դուրս եկել, քայլել, գոռացել՝ «Նիկոլ էլ չկա», բայց մի ամսից նորից խորհրդարան է վերադաձել:
-Ես կասեի՝ Փաշինյանը Հայաստանում արդեն իշխանության չէ: Այսինքն՝ իշխանություն ունի, բայց դա իներցիայի ուժով է: Հետեւաբար հասարակությանը պետք է ճիշտ «մեսիջներ» տալ, մարդկանց հետ անկեղծ լինել ու, ամենակարեւորը, ասել, թե ինչ է լինելու հետփաշինյանական Հայաստանում: Այսինքն՝ մեր երկիրն ի՞նչ օրակարգով է առաջ շարժվելու նրանից հետո:
Ինչ վերաբերում է ներկայիս տիտղոսային ընդդիմությանը, ապա, իրավացի եք, այն չի առաջարկում իրական եւ այլընտրանքային բովանդակություն: Նրանց հիմնական վրիպումն այն էր, որ չկարողացան սեփական օրակարգն ու Հայաստանի տեսլականը ներկայացնել մարդկանց: Իսկ օրակարգի բացակայությունը ձեռնտու է գործող վարչապետին, որ իշխանությունը պահում է «նախկին-ներկա» մարտավարությամբ:
– Ձեր կողքին ո՞ւմ ենք տեսնելու հարթակում:
– Մարդկանց, ովքեր կիսում են մեր գաղափարները: Մեկն, օրինակ, Էդգար Ղազարյանին կտեսնեք, կտեսնեք նաեւ կուսակցական եւ անկուսակցական այլ գործիչների:
ՍԵՎԱԿ ՎԱՐԴՈՒՄՅԱՆ
