Հոկտեմբերի 20-ին մեկօրյա աշխատանքային այցով Ադրբեջան է մեկնել Թուրքիայի նախագահ Էրդողանը։ Նրան պետական այլ գործիչների թվում ուղեկցել են պաշտպանության նախարար Հուլուսի Աքարն եւ արտգործնախարար Մեւլութ Չավուշօղլուն։ Ըստ թուրքական մամուլի, Էրդողանի այցը իրականացվել է Ալիեւի հրավերով, իսկ նպատակը՝ Զանգելանի, այսպես կոչված, միջազգային օդակայանի բացումը։ Ի դեպ՝ սա երկրորդ օդակայանն է Ադրբեջանում, որն Ալիեւի հետ բացում է Էրդողանը։ Առաջինը նա բացել էր 2021-ի հոկտեմբերի 25-ին Ֆիզուլիում։
Անդրադառնալով օդակայանի բացմանն ընդդիմադիր “Halk TV”-ի էկրանից, հեռուստատեսության հաղորդաշարի հեղինակ Այշենուր Ասլանն ասաց. «Ադրբեջան գնալը հարեւանի տուն գնալու պես բան է դարձել։ Որքան էլ նշվի, թե գնում են օդակայանի բացման համար, սակայն դա պատրվակ է։ Ըստ երեւույթին Էրդողանը գոնե մեկ մլրդ. կխնդրի Ալիեւից, նա դոլարներ շատ ունի, իսկ Թուրքիան՝ դրանց խիստ կարիքը»։
Թուրքական «Միլլիյեթ»-ը ինտերնետային էջում Էրդողանի այցին արձագանքել է. «Երկու կամուրջ Ադրբեջանում» վերնագրով։ Խոսքն անշուշտ օդային կամուրջի մասին է։ Այս թերթի վկայությամբ Ադրբեջան այցելող Էրդողանի ինքնաթիռը վայրէջք է կատարել հենց Զանգելանում, իհարկե նախքան օդակայանի բացումը։ Ուշագրավ է «Միլլիյեթ»-ի վկայությունը. «Էրդողանը վայրէջք կատարեց Զանգելանի միջազգային օդակայանում, որը Հայաստանի օկուպացիայից ազատագրված տարածքներում Ադրբեջանի կառուցած 2-րդ օդակայանն է։ Նախագահ Էրդողանը ժամանեց Ադրբեջանի ազատագրած Ղարաբաղ։ Զանգիլանի օդակայանը Ղարաբաղի՝ դեպի աշխարհ բացվող 2-րդ պատուհանն է»։
Այնուհետեւ նշվում է, որ Թուրքիայի ու Ադրբեջանի նախագահները ցամաքային ճանապարհով Զանգելանից անցնելու են Ջեբրայիլ, որտեղ նրանք մամուլի համատեղ ասուլիս են տալու։ Նյութը պատրաստելու պահին վերջիններս դեռ Ջեբրայիլ չէին հասել։ Սակայն անկախ դրանից ենթադրելի, թե ինչ պիտի խոսեն, դեռ չեն խոսել։ Բայց որ մեկ մլրդ. դոլարի մասին հաստատ չեն խոսի, առանց մամուլի ասուլիսի էլ, ենթադրելի է։
ՀԱԿՈԲ ՉԱՔՐՅԱՆ
