«Գորշ գայլերի» վտանգը Գերմանիայում աճում է

Հոդվածի հեղինակ Շտեֆան Կրայթեվոլֆը (Stefan Kreitewolf) վերնագրում նշված վտանգի մասին ծավալուն անդրադարձ է արել գերմանալեզու dtj-ի (գերմանաթուրքական հանդեսի) հունիսի 29-ի առցանց հրապարակման մեջ:

Հեղինակը նկատել է տալիս, որ Գերմանիայում ծայրահեղ աջակողմյան հայացքներ ունեցող թուրքերի աճը իրական վտանգ է, այն կարող է խաթարել դաշնության հանրային անդորրը:  2022-ին հրապարակված սահմանադրության պաշտպանության զեկույցից երեւում է, որ աջ ծայրահեղականությունը դաշնության ամենամեծ սպառնալիքն է, սակայն չի բացատրվում, թե ինչու Գերմանիայում չի արգելվում այդ սպառնալիքներից մեկի՝ «Գորշ գայլեր» կազմակերպության գործունեությունը: Գերմանիայում մոտ 12 100 համակիր ունի այսպես կոչված Ülkücü  շարժումը, որի անդամները հատկապես սոցցանցերում են բացահայտ բռնությամբ սպառնում իրենց հակառակորդներին:

Բացի PKK-ից և ընդհանրապես քրդերից, «Գորշ գայլերի» համար թշնամու կերպար են հայերը, հրեաները, ընդդիմության անդամները, ինչպես նաև թուրքական կառավարության հակառակորդները, իրազեկում է Շտեֆան Կրայթեվոլֆը:

Հոդվածագիրը հիշեցնում է, որ Ֆրանսիայում «Գորշ գայլերի» գործունեությունն արգելված է 2020 թվականից, իսկ թե ինչու Գերմանիայում նույնը չի անում ԳԴՀ ներքին գործերի նախարար Նենսի Ֆեյզերը, որ պաշտոնամուտին խոստացել էր երկրում ծայրահեղ աջերի դեմ հետեւողական գործունեություն իրականացնել, չի բացատրվում:  Ի հեճուկս բոլոր զգուշացումների, դեռ որեւէ բան չի արվել:

dtj-ի հունիսի 7-ի հրապարակման մեջ նույն հեղինակը ուշադրություն էր բեւեռել այն հանգամանքի վրա, որ Թուրքիայի կառավարության նախկին անդամ Չավուշօղլուն, որ «Գորշ գայլերի» համակիր է, արտգործնախարարի պաշտոնը լքելու առթիվ ի թիվս այլ երկրների պաշտոնյաների, նաեւ Գերմանիայից է անսպասելի «գնահատանք»  ստացել:  Հեղինակը նկատի ունի Գերմանիայի նախկին արտգործնախարար Զիիգմար Գաբրիելի թվիթերյան թուրքերեն գրառումը, որում շնորհակալություն էր հայտնում Չավուշօղլուին՝ «դժվար ժամանակներում վստահելի համագործակցության համար»:    Շտեֆան Կրայթեվոլֆը հիշեցնում է սոցիալ-դեմոկրատ Գաբրիելին, որ տարիներ առաջ Համբուրգում թուրք կուսակիցների առջեւ ելույթի ժամանակ Չավուշօղլուն ֆաշիստական՝ գայլերի նշանն էր ցույց տվել, ինչպես նաեւ երբեւիցե չի թաքցրել, թե հարում է նրանց:  Գերմանացի հեղինակը հիշեցնում է հայերիս քաջ հայտնի մեկ ուրիշ օրինակ՝ Ուրուգվայում Չավուշօղլուն նույն նշանն էր ցույց տվել Հայոց ցեղասպանությունը վերապրողների ժառանգներին՝ վերահաստատելով, որ ուրանում է իր նախնիների ոճիրը:
Հայաստանում էլ ի դեպ պիտի պաշտոնապես կանխվի «Գորշ գայլերի» հնարավոր մուտքը, գործունեությունը: Մի անգամ ֆաշիստական այդ նշանով արդեն սպառանցել են Ծիծեռնակաբերդից:

ԱՆԱՀԻՏ ՀՈՎՍԵՓՅԱՆ