BBC-ի միջազգային հարցերով ավագ թղթակից Լիզ Դուսետը Կահիրեից չորեքշաբթի օրը հաղորդեց, որ Եգիպտոսի նախագահ Աբդուլ Ֆաթահ ալ-Սիսիի ներածական խոսքով բացված Արաբական լիգայի արտահերթ նիստի ընթացքում որոշվել է 53 մլրդ. դոլար հատկացնել Գազայի վերաշինության համար: Սա՝ ի պատասխան Մ. Նահանգների նախագահ Դոնալդ Թրամփի ցնորական առաջարկին՝ Գազայի 2,7 միլիոն բնակչությանը տեղափոխելու այլ տեղ ու նրա հայրենիքը վերածելու «Միջին Արեւելքի Ռիվիերայի», ինչը զարմացրել ու զայրացրել էր ոչ միայն արաբական երկրների ղեկավարներին:
Մի քանի ժամ տեւած նիստի ավարտին Արաբական լիգայի վարիչ-քարտուղար Ահմատ Աբուլ Ղեյդը հայտարարել է, որ մասնակիցները որոշել են 53 մլրդ. դոլար հատկացնել Գազայի վերաշինությանը, որը 90 տոկոսով կործանված է, շենք-շինությունները մասամբ կամ ամբողջովին ավերված:
BBC-ի թղթակիցը հաղորդել է նաեւ, որ նիստին ներկայացվել եւ հաստատվել է արաբ եւ միջազգային մասնագետների կողմից պատրաստված 91 էջանոց ճարտարապետաշինարարական փաթեթ, որը նախատեսում է բացի բնակելիներից կառուցել հիվանդանոցներ, դպրոցներ, մանկապարտեզներ եւ հասարակական այլ հիմնարկներ, ինչպես նաեւ ճանապարհներ:
Նիստի ընթացքում ամենաբուռն քննարկումը եղել է «Համասի» շուրջ, որն սկսել էր Գազայի պատերազմը: Որոշվել է «Համասի» քաղաքական ղեկավարումը հանձնել Պաղեստինյան ինքնավարության նախագահ Մահմուդ Աբբասին, սակայն ինչ վերաբերում է ռազմականին, ապա Լիգան, ինչպես հաղորդում է BBC-ի թղթակիցը, չի կարողացել բոլորի կողմից ընդունելի եզրակացության հանգել, քանզի «Համասը» կարմիր գիծ է հայտարարել իր զինաթափման որեւէ նախապայման:
Բոլոր դեպքերում, Լիգան կրկնել է ՄԱԿ-ի կողմից վաղուց ընդունված բանաձեւը՝ երկու պետություն մեկ տարածքում, որին կատաղիորեն դեմ է Իսրայելը:
Ռ. Ա.
