Ես ասել եմ, որ հիմա դե յուրե հաստատված է, որ մեր Սահմանադրության մեջ Ադրբեջանից տարածքային պահանջներ չկան, մամուլի ասուլիսի ժամանակ հայտարարեց ՀՀ վարչապետ Նիկոլ Փաշինյանը:
«Մյուս կողմից, մենք տեսնում ենք, որ Ադրբեջանի սահմանադրության մեջ տարածքային պահանջներ կան մեր երկրի նկատմամբ, բայց մենք Ադրբեջանի սահմանադրությունը փոխելու հարցը չենք բարձրացնում, ինչու՞։ Որովհետև խաղաղության պայմանագրի արդեն իսկ համաձայնեցված մասում կան համաձայնեցված հոդվածներ, որոնք ստորագրելու և վավերացնելու պարագայում այդ հարցերը փակում են, ընդհանրապես հանում են։
Ասում են՝ մենք խաղաղության պայմանագիր չենք ստորագրի, մինչև այս հարցը չլուծվի, բայց այդ հարցի լուծումը խաղաղության պայմանագրի ստորագրումն է։ Այսինքն հարցի լուծումը հասանելի է նրան, ով որ բարձրացնում է այդ հարցը, որովհետև մենք էլ ասում ենք մենք պատրաստ ենք ստորագրել: Հենց ստորագրեցինք, մեզ համար էլ է հարցը լուծվում, իրենց համար էլ:
Առավել ևս, եթե հաշվի առնենք, որ երբ մենք խաղաղության պայմանագիրը ստորագրեցինք, մենք պարտավոր ենք ուղարկել Սահմանադրական դատարան, որպեսզի ՍԴ-ն դրա համապատասխանությունը Սահմանադրությանը ստուգի»,-ասաց Փաշինյանը:
Նրա խոսքով, եթե ՍԴ-ն հաստատեց, որ պայմանագիրը համապատասխանում է Սահմանադրությանը, խոչընդոտ չկա, պայմանագիրը կարող է գնալ և վավերացվել խորհրդարանի կողմից։
«Երբ որ վավերացվեց խորհրդարանի կողմից, մեր երկրի Սահմանադրության 5-րդ հոդվածի երրորդ կետի համաձայն, վավերացված միջազգային պայմանագրերի և ներքին օրենսդրության միջև հակասության առկայության դեպքում գերակա է միջազգային վավերացրած պայմանագիրը։ Լուծվում է այդ հարցը։ Այսինքն Ադրբեջանի այդ փաստարկը որևէ քննադատության չի դիմանում»,- հայտարարեց Փաշինյանը:
