Մինսկի խմբի համանախագահությունը լուծարելուն համաձայն ենք հետևյալ հիմնավորմամբ, որ եթե չկա կոնֆլիկտ, կոնֆլիկտի սպասարկմամբ զբաղվող ֆորմատի իմաստը ո՞րն է, այսօրվա մամուլի ասուլիսի ժամանակ հայտարարեց ՀՀ վարչապետ Նիկոլ Փաշինյանը:
«Բայց մենք ուզում ենք համոզվել, որ Մինսկի խմբի համանախագահության լուծարումը Ադրբեջանի համար էլ է այս նույն բանը նշանակում և ոչ թե Ադրբեջանի մղումն այն է, որ հիմա Մինսկի խմբի համանախագահությունը լուծարենք և նոր կոնֆլիկտ սկսենք՝ ՀՀ տարածքային տարածքների նկատմամբ տարածքային պահանջներ ձևավորելու հիմքով։
Այսինքն, եթե դա նշանակում է խաղաղություն, մեր ինչի՞ն է պետք ԵԱՀԿ Մինսկի խումբը։ Եթե Ադրբեջանին դա ինչ-որ ձևով խանգարում է, որ ինքը կոնֆլիկտ ստեղծի, այդ դեպքում ի՞նչ իմաստ ունի այդ խմբի լուծարումը։ Եթե դա Ադրբեջանի համար նշանակում է կանաչ լույս Հայաստանի դեմ տարածքային պահանջներ ներկայացնելու և խորացնելու համար ի՞նչ իմաստ ունի այդ գործողությունը։
Իսկ կա արդյոք հիմք մտածելու, որ կարող է Ադրբեջանը նման մտադրություն ունենալ։ Նման հիմքեր կան. հենց արևմտյան Ադրբեջան խոսույթը Հայաստանի տարածքային ամբողջականության նկատմամբ ուղիղ ոտնձգություն է: Ոչ միայն այն պատճառով, որ Ադրբեջանը, ըստ էության պաշտոնական մակարդակում Հայաստանի ինքնիշխան տարածքի շուրջ 60%-ը անվանում է Արևմտյան Ադրբեջան, այլև համապատասխան անունով կազմակերպության հայեցակարգում ձևակերպումներ են դրած, որը նշանակում է, որ այդ խոսույթը օգտագործող ցանկացած մարդ չի ճանաչում ՀՀ տարածքային ամբողջականությունը առնվազն 60%-ով»,- ասաց Փաշինյանը:
Նա միաժամանակ նշեց, որ Արևմտյան Ադրբեջանը Ադրբեջանի արևմտյան շրջաններն են։ «Հայաստանի տարածքում չի կարող լինել արևմտյան Ադրբեջան։ Այս բառապաշարի ներքո ցանկացած թեմա Հայաստանի համար քննարկելի չի, մի պարզ պատճառով, որովհետև չի կարող Հայաստանը որևէ մեկին հրավիրել քննարկման, ասել՝ եկեք քննարկենք մեր տարածքային ամբողջականությունը, չի կարող այդպիսի բան լինել:
Եթե որևէ մեկի մտքով այդպիսի բան անցնի, դա էլ է քրեական հանցագործություն»,- ասաց Փաշինյանը։
