Թաեքվոնդոյի «Ար-Մար» ակումբի 10 պատանի մարզիկներով համալրված Հայաստանի հավաքականը գերազանց ելույթներ ունեցավ Վրաստանի պատանիների բաց առաջնությունում: Մեր մարզիկները նվաճեցին 2 ոսկե, 3 արծաթե եւ 4 բրոնզե մեդալ:
Իրենց գերազանց դրսեւորեցին եւ մրցաշարի հաղթողներ դարձան Արթուր Վարդանյանն ու Սարգիս Գրիգորյանը: Արծաթե մեդալներով պարգեւատրվեցին Հենրի Բադալյանը, Արթուր Գալստյանն ու Գագիկ Առաքելյանը: Բրոնզե մեդալներ նվաճեցին Ռուբեն Առաքելյանը, Ռոման Հայրապետյանը, Սլավա Խաչատրյանն ու Ռաֆիկ Սուքիասյանը: Հավաքականի գլխավոր մարզիչը Գագիկ Դարբինյանն էր: Մրցումները սպասարկող մրցավարների թվում էր Դավիթ Ղահրամանյանը:
Վրաստանի ներկայացուցիչների հետ նախնական պայմանավորվածություն է ձեռք բերվել հուլիսին հավաք կազմակերպելու հարցում: Դրանից հետո հայ թաեքվոնդոյիստները կնախապատրաստվեն օգոստոսին Բուլղարիայում կայանալիք աշխարհի պատանեկան առաջնությանը:
