Գոհար Գասպարյանի 100-ամյակը հրաշալի ծրագրով նշվեց թատրոնի ճեմասրահում
Դեկտեմբերի 2-ին Հայաստանի Հանրապետության Կենտրոնական բանկի կողմից թողարկվեց արծաթե մետաղադրամ՝ 300 հատ, քաշը ՝ 33 գրամ, 925 պռոբ: Հուշադրամի դիմերեսին պատկերված է Գոհար Գասպարյանի բեմական կերպարը՝ Սպենդիարյան օպերայի և բալետի ազգային ակադեմիական թատրոնի ֆոնին, իսկ դարձերեսին՝ երգչուհու դիմապատկերը՝ վարդերի և սոխակի պատկերներով: Դեկտեմբերի 14-ին երգչուհու ծննդյան օրը ՀՀ-ում մարվեց Գոհար Գասպարյան- 100 նամականիշը, իսկ ժամը 14-ին Սպենդիարյան օպերայի եւ բալետի ազգային ակադեմիական թատրոնի Մեծ ճեմասրահում բացվեց թանգարանային բացառիկ ցուցադրություն, որ նվիրված էր հայ մեծանուն երգչուհի Գոհար Գասպարյանի ծննդյան 100- ամյակին: Երեւանում «Հայաստանի սոխակի» 100-ամյակին նվիրված ուրիշ համերգ էլ կայացավ՝ Արամ Խաչատրյան թանգարանում հնչեց 19 «Ավե Մարիա»: Դրանից առաջ՝ հուլիսի 24-ին, Հայաստանի ֆիլհարմոնիկ նվագախումբը երգչուհու 100-ամյա հոբելյանին էր նվիրել Պուչչինիի «Բոհեմ»ի համերգային կատարումը: Նոյեմբեր- դեկտեմբերին Կոմիտասի անվ. կոնսերվատորիայում կայացած վոկալ մրցույթը նույնպես նվիրված էր մեծանուն երգչուհու 100-ամյակին:
Երաժշտասեր ավագ սերունդը քաջ գիտե Գոհար Գասպարյանի ձայնի լայն դիապազոնի մասին, կարող է հաստատել, թե նրա պրոֆեսիոնալ վարկը, նրա անունն ու հռչակը ընդլայնել են մեր օպերային թատրոնի սահմանները, իսկ մեր ժողովուրդն անսահման իր սերն երգչուհու հանդեպ ընդգծել է՝ ծնված աղջիկներին Գոհար անվանելով:
Դեկտեմբերի 14-ին Սպենդիարյան օպերայի եւ բալետի ազգային ակադեմիական թատրոնի Մեծ ճեմասրահում բացված թանգարանային բացառիկ ցուցադրությունը, որ ընդգրկում էր երգչուհու կյանքի եւ գործունեության մասին բազմածավալ արխիվային էջեր ու նմուշներ, նույնիսկ հպանցիկ դիտումով գրավում էր, քանզի դրանց մատուցման համար ճեմասրահը օրգանական վայր էր:
Ցուցադրությունն ընդգրկում էր երգչուհու կյանքն ու ժառանգությունը ներկայացնող ցուցանմուշներ թատրոնի արխիվից, Գասպարյանի անձնական արխիվից, ինչպես նաեւ Չարենցի անվան գրականության եւ արվեստի թանգարանային ֆոնդից, «Արմենիա Նիպպոն» հայ-ճապոնական գիտակրթական միության արխիվից: Օպերային թատրոնը վերականգնել եւ ցուցադրում էր երգչուհու օպերային զգեստները, արխիվային լուսանկարներն ու ազդագրերը:
Թանգարանային ցուցադրությանը հաջորդեց տեսապրոյեկցիոն լուծումներով եւ երաժշտագիտական մեկնաբանություններով համակցված համերգային մի ծրագիր, ներկայացվեց Գոհար Գասպարյանի ստեղծագործական կյանքի եւ գործունեության մասին պատմող փաստավավերագրական ֆիլմ: Համերգային ծրագիրը կազմված էր հատուկ ընդգծված նպատակով՝ լսել տալ Գոհար Գասպարյանի մանկությունից պատանեկություն, երիտասարդություն, ողջ կյանք ուղեկցող երգեր՝ նրա հավատամքը՝ Կոմիտաս, ձոն առ հայրենիք՝ Հայաստան: Դժվար էր նստած ունկնդրել մի համերգ, որ ծայրից ծայր հոտնկայս, ձիգ կանգնել էր պարտադրում, ուղղում մեր կորացած ողնաշարը: Համերգին մասնակցեցին ՀՀ վաստակավոր արտիստ բարիտոն Գեւորգ Հակոբյանը, բաս Հայկ Տիգրանյանը, ՀՀ վաստակավոր արտիստ մեցցո-սոպրանո Քրիստինե Սահակյանը, սոպրանոներ Աննա Այվազյանը, Սոֆյա Սայադյանը, տենոր Հովհաննես Անդրեասյանը:
«Գոհար Գասպարյան 100» մշակութային ծրագիրը գործընկերների աջակցությամբ իրականացրել էր Արմինե Տիգրանյանը, որին հաջողվել էր մեծ երգչուհու կերպարը մատուցելիս ընդգծել նրա հայրենասիրությունը: Մի հատկանիշ, որ մեր երկրում հատուկ շեշտադրման արժանի է, որի պակասն զգալի է:
«Երբ գրում էի ցերեկույթի տեքստը, հասկացա, որ Գոհար Գասպարյանի ողջ կյանքը հայրենասիրության վառ օրինակ էր: Եգիպտոսից ներգաղթեց հայրենիք, շատ փորձություններ, զրկանքներ կրեց, ունեցավ բազմաթիվ հնարավորություններ, բայց երբեք չլքեց Հայաստանը: Համաշխարհային օպերային աստղ լինելով՝ նա անմասն չմնաց հայկական ռոմանսներն աշխարհին ներկայացնելուց, հայրենասիրական կոչեր հնչեցնելուց, իր աշակերտներին, ուսանողներին հայրենի վոկալ դպրոցի ավանդույթներին ծանոթացրեց: Ես չխոսեցի երգչուհու կոչումներից, պատվոգրերից: Նա շատ անփութորեն էր վերաբերվում դրանց, իր փառքին: Իր համար կարեւոր էր իր առաքելությունը՝ Գոհար Գասպարյանի անվան կողքին վեր բարձրացնել հայրենիքը, հայրենասիրության գաղափարը», մեր զրույցում ասում է ցերեկույթի կազմակերպիչ Արմինե Տիգրանյանը:
Այն հանգամանքը, որ Երեւանի քաղաքապետարանն ու օպերային թատրոնն աջակցել էին մշակութաբան Արմինե Տիգրանյանի նախաձեռնած ցերեկույթին, իհարկե դրական է, սակայն եւ բնական, քանի որ խոսքը քնարա-կոլորատուրային սոպրանո, ԽՍՀՄ, ՀԽՍՀ ժողովրդական արտիստ, Մեսրոպ Մաշտոց շքանշանակիր, օպերային թատրոնի բազմավաստակ երգչուհի, Կոմիտաս կոնսերվատորիայի պրոֆեսոր Գոհար Գասպարյանի 100-ամյա հոբելյանի մասին է: Դեկտեմբերի 14-ին օպերային թատրոնի բազմամյա ղեկավար, երգիչ Տիգրան Լեւոնյանի ծննդյան տարեդարձն էլ էր, եւ շատ զարմանալի էր, որ Հայաստանի միակ օպերային թատրոնը, որ դեռ ազգային մասնիկն է կրում, իր տան գլխավոր բեմում չէր նշում այդ բեմին իրենց վաստակն ու փառքը ընձյուղած երկու նվիրյալ ամոլի տարեդարձը:
Ապերախտ բառը մեղմ չէ՞, որ գրեմ:
ԱՆԱՀԻՏ ՀՈՎՍԵՓՅԱՆ
