ՖԻԴԵ-ն հրապարակել է օգոստոսի 11-ին Նորվեգիայի Տրոմսյո քաղաքում մեկնարկող շախմատի աշխարհի գավաթի խաղարկության խաղացանկը: Մրցաշարի 128 մասնակիցներից ամենաբարձր անհատական վարկանիշն ունեցող Լեւոն Արոնյանն առաջին փուլում կմրցի ամենացածր վարկանիշ ունեցող Ղրղզստանի ներկայացուցիչ Միխայիլ Մարկովի հետ: Վերջինս Ղրղզստանի պատմության մեջ առաջին անգամ աշխարհի գավաթի մրցաշարի ուղեգիր է նվաճել: Այդ մրցախաղում Արոնյանի հաղթանակը կասկած չի հարուցում: Հաջորդ փուլում նրա մրցակիցը կլինի Իստրատեսկու-Լիսի մրցախաղի հաղթողը:
Սերգեյ Մովսիսյանը կմրցի նորվեգացի Յոն Լյուդվիգ Համերի հետ: Հրանտ Մելքումյանի մրցակիցը կլինի պերուացի Խուլիո Գրանդա Զունիգան, իսկ Վլադիմիր Հակոբյանը 2-րդ փուլի ուղեգրի համար կպայքարի վիետնամցի Նգուեն Սոնի հետ:
