Պաշտպանության նախարարությունում չգիտեն կամ, գուցե, չեն կարողանում պատասխանել հարցին, թե բանակում ովքե՞ր են եղել 5-րդ շարասյան ներկայացուցիչները: «Ազգ»-ի տեղեկություններով՝ Ազգային ժողովի ընդդիմադիր պատգամավորներից մեկը ՊՆ հարցում է ուղարկել՝ խնդրելով ասել, թե Նիկոլ Փաշինյանի ասած 5-րդ շարասյունն ովքե՞ր են ներկայացրել:
Փաշինյանը, հիշեցնենք, 2023-ի տարեվերջին ՝ նոյեմեբերի 24-ին, ՀՀ քաղաքացիների եւ սփյուռքահայերի հետ հարցուպատասխանի ուղիղ եթերի ժամանակ պատասխանելով քաղաքացիներից մեկի հարցին, թե «հնարավո՞ր է՝ 44-օրյա պատերազմը պարտվել ենք, քանի որ բանակում գործել է 5-րդ շարասյուն», արձագանքել էր. «ՀՀ զինված ուժերում այլեւս չկա 5-րդ շարասյուն»:
Ընդդիմադիր պատգամավորը «Ազգ»-ի հետ զրույցում հստակեցրեց՝ նախարար Ս. Պապիկյանի ղեկավարած գերատեսչությունից խնդրել էին հստակեցնել՝ 5-րդ շարասյան ներկայացուցիչներին ե՞րբ են հայտնաբերել ու ովքե՞ր են այդ անձինք:
«Հարցը փորձել էին գաղտնիության դաշտ տեղափոխել, բայց մոռանում են, որ պատգամավորը գաղտնի տեղեկությունների մասին հարցումներ անելու եւ դրանց պատասխանը ստանալու իրավունք ունի: Խոսքը թե՛ պետական, թե՛ ռազմական, թե՛ պաշտպանական-անվտանգային գաղտնիքների մասին է: Բայց Պապիկյանն ու նրա յուրայիններն ամեն ինչ արել էին Փաշինյանի ասածները պարտակելու ու նրա՝ ըստ երեւույթին անհիմն հայտարարությունը լղոզելու համար: Եվ դա արել են բավական փնթի, իրենց բնորոշ ցինիկ ձեւով»,- նշեց մեր զրուցակից պատգամավորը:
ՍԵՎԱԿ ՎԱՐԴՈՒՄՅԱՆ
