Սիրիան միացել է ՄԱԿ-ի Քիմիական զենքի արգելման կոնվենցիային, հաղորդում է Ռոյթեր գործակալությունը:
ՄԱԿ-ում Դամասկոսի մշտական ներկայացուցիչ Բաշար ալ Զաֆային հայտարարել է, որ իր երկիրն արդեն կոնվենցիայի «լիիրավ անդամ» է:
Ավելի վաղՙ հինգշաբթի օրը, ՄԱԿ-ի ներկայացուցիչները հայտարարել էին, որ իրենք Սիրիայի իշխանություններից ստացել են կոնվենցիային միանալու հետ կապված փաստաթղթեր: Դրանց բովանդակությունը պաշտոնապես չէր բացահայտվել:
Սեպտեմբերի 10-ին հայտնի էր դարձել, որ Սիրիայի իշխանությունները համաձայնել են երկրում գտնվող քիմիական զենքը միջազգային վերահսկողությանը հանձնել դրա հետագա ոչնչացման նպատակով: Այդ առաջարկությամբ հանդես էր եկել Ռուսաստանըՙ ի պատասխան ԱՄՆ-ի պետքարտուղար Ջոն Քերրիի այն հայտարարության, թե Սիրիայի զինաթափման դեպքում ամերիկացիները կարող են հրաժարվել այդ երկրին հարվածելու մտադրությունից:
ՄԱԿ-ի Քիմիական զենքի արգելման կոնվենցիան գործում է 1997 թվականից: Սիրիայի միանալուց հետո դրա լիիրավ անդամ պետությունների թիվը հասավ 190-ի: Փաստաթղթին չեն միացել միայն ԿԺԴՀ-ն, Անգոլան, Հարավային Սուդանը եւ Եգիպտոսը, իսկ Իսրայելն ու Մյանման ստորագրել են, բայց չեն վավերացրել:
Որոշ ուժեր պնդում են, թե սիրիացիներիը իրենց քիմիական զենքը միջազգային վերահսկողությանը հանձնելուց առաջ փորձում են թաքցնել դրա մի մասը, զինանոցները վերաբաշխելով ամբողջ Սիրիայի տասնյակ ռազմակայաններում: Մասնավորապես ամերիկյան «Ուոլ Սթրիթ ջոռնըլ» թերթը գրում է, որ եթե Դամասկոսի իշխանությունների այդ գործողությունները հաստատվեն, ապա կարող են ոչ միայն նպաստել քիմիական զենքի մի մասի քողարկմանը, այլեւ բարդացնել ԱՄՆ-ի խնդիրը, եթե Սպիտակ տունն այնուամենայնիվ որոշի հարվածել Սիրիային:
Ապստամբների «Ազատ սիրիական բանակի» ներկայացուցիչները նույնիսկ պնդում են, թե իշխանությունները քիմիական զենքն իբր տեղափոխում են հարեւան երկրներ, մասնավորապեսՙ Լիբանան: Սակայն դեպքերին ուշի-ուշով հետեւող Իսրայելի հետախուզությունը չի հաստատում ընդդիմության այդ պնդումները:
