Արեւելյան գործընկերության ոչ պաշտոնական երկխոսության շրջանականերում սեպտեմբերի 12-14-ը Երեւանում կազմակերպվել է կրթության նախարարների հանդիպում, որին ներկա լինելու համար Հայաստան են ժամանել Եվրոպական հանձնաժողովի կրթության, մշակույթի, լեզվական բազմազանության եւ երիտասարդության հարցերով հանձնակատարը, ԵՄ խորհրդում նախագահող Լիտվայի կրթության եւ գիտության նախարարը, Վրաստանի կրթության ու գիտության նախարարը եւ ուրիշներ:
Երեկ «Արմենիա-Մարիոթ» հյուրանոցում Հայաստանի կրթության նախարարը հանդիպեց արտասահմանցի իր գործընկերներին եւ Եվրոմիության հանձնակատար Շտեֆան Ֆյուլեին:
Երեկվա հանդիպմանը ներկա էր նաեւ Ադրբեջանից ժամանած պատվիրակությունը:
Նախարար Արմեն Աշոտյանի փոխանցմամբ` նման հանդիպում առաջին անգամ է լինում մեր երկրում:
Հանդիպման սկզբում հայաստանյան քարտուղարությունը ներկայացրեց զեկույց Հայաստանում Բոլոնյան գործընթացի վերջին զարգացումների ու մարտահրավերների մասին: Անդրադարձ եղավ նաեւ Erasmus+ ծրագրին, որն, ինչպես նշվեց, ավելացնում է երկրների միջեւ ուսանողների փոխանակման հնարավորությունները:
Մասնակից երկրների պատվիրակությունները ներկայացրին զեկույցներ նաեւ ՏԵՄՊՈՒՍ ծրագրի դերի եւ բարձրագույն կրթության վրա դրա ազդեցության մասին:
Իսկ Լիտվայի կրթության ու գիտության նախարար Դաինիուս Պավալկիսին իր խոսքն ամփոփեց հետեւյալ համոզմամբ. «Կրթությունը մեծ դեր է խաղում յուրաքանչյուր հասարակության զարգացման համար: Հետեւաբար կարեւոր է, որ կրթության որակը լինի այնպիսին, որ կրթությունը հասցնի իր նպատակին»:
