Գյումրիում արդեն աշնանային պաղ եղանակ է, տնակային ավանների բնակիչները սկսել են վառարաններ տեղադրել, բայց նրանցից շատ քչերին է հաջողվել վառելափայտ ձեռք բերել: Տնակաբնակ հարյուրավոր ընտանիքների համար, ինչպես նշվում է Գյումրու «Շիրակ կենտրոն» հասարակական կազմակերպության տարածած հաղորդագրությունում, կրկին ձմռան վառելիքի հայթայթման վայրեր են դարձել աղբանոցներն ու քաղաքի ծայրամասերի թփուտները: Տասնյակ ընտանիքներ թեեւ ամբողջ ամառ հավաքել են ձեռքներն ընկած իրերըՙ պլաստիկե շշեր, թուղթ, հնամաշ կոշիկներ, անվադողեր, շորեր եւ այլն, սակայն այդ ամենով կկարողանան ընդամենը հաշված օրեր մի կերպ տաքացնել իրենց խոնավ ու շարքից դուրս եկած վագոն-տնակները:
«Թեեւ «Շիրակ կենտրոնը» ամերիկահայ բարերար Էլվիս Մադաթյանի օժանդակությամբ կուտակել է եւ բաժանելու է որոշակի քանակությամբ վառելափայտ, սակայն ընդամենը մեկ հովանավորի օժանդակությունը բավարար չէՙ ապահովելու գոնե առավել անմխիթար վիճակում գտնվող կարիքավոր անօթեւան ընտանիքների վագոն-տնակները ջեռուցելու համար անհրաժեշտ վառելափայտի նվազագույն չափաբաժին: Շիրակի առանձնապես ցրտաշունչ ձմռան նախաշեմին մեր հայրենակիցներին կոչ ենք անում աջակցել Գյումրու տնակային ավաններում բնակվող առավել անապահով ընտանիքներինՙ նրանց կացարաններում գոնե նվազագույն ջերմություն ապահովելու համար»,- ասվում է կենտրոնի տարածած կոչում:
