Յոթանասունչորս տարեկանում օգոստոսի 30-ին Դուբլինում (Իռլանդիա) վախճանվել է 20-րդ դարի ամենանշանավոր բանաստեղծներից մեկըՙ Շեյմս Ջաստին Հիյնին: Նա նաեւ դրամատուրգ էր, թարգմանիչ եւ դասախոս: Ծնվել էր Քեսլդոուսոնում (Հյուսիսային Իռլանդիա) 1939 թվի ապրիլի 13-ին: Ընտանիքի ինը երեխաներից առաջինն է եղել: Չլինելով քաղաքական խմբավորումների ներկայացուցիչ, իր ստեղծագործություններում նա հստակ քաղաքացիական դիրքորոշում է ունեցել եւ անդրադարձել է իր երկրին հուզող խնդիրներին, դիտելով դրանք պատմական տեսանկյունից: Դրա համար էլ նրան հաճախ համարել են Իռլանդիայի «երգիչը եւ խիղճը»: Նա հավատացած էր, որ բանաստեղծությունն ու արվեստները առհասարակ «ամրապնդում են մարդու ներքնաշխարհը»: Իր նշանավոր գործերի թվին են պատկանում «Բնագետի մահը» (1966), «Դաշտային աշխատանք» (1979), «Հոգեկանի մակարդակը» (1996) եւ «Մարդկային կապանք» (2010) գործերը: Արժանացել էր բազմաթիվ մրցանակների, այդ թվում նաեւ գրականության Նոբելյան մրցանակիՙ 1995 թվին:
«Ազգ»ը հետագայում առավել մանրամասն կանդրադառնա նրա կյանքին եւ գործունեությանը:
