Սեպտեմբերի 2-ից Հայաստանի ամերիկյան համալսարանի բակալավրի կրթական աստիճան շնորհող ծրագիրը հյուրընկալեց իր առաջին ուսանողներին: Առաջարկվող բոլոր ծրագրերը հաստատագրված են ԱՄՆ-ի համալսարանների եւ քոլեջների արեւմտյան ասոցիացիայի ավագ դպրոցների եւ համալսարանների հավատարմագրման հանձնաժողովի կողմից:
Ինչպես ընդունված է աշխարհի շատ համալսարաններում, առաջին կուրսեցիների նորամուտը նշվում է այն նույն շուքով, ինչպես ավարտական հանդիսությունն է: ՀԱՀ-ը Հայաստանում առաջին անգամ, բակալավր ընդունված առաջին կուրսեցիների համար երեկ կազմակերպել էր «Նորամուտի հանդիսավոր արարողություն»:
ՀԱՀ նախագահ Բրյուս Պողոսյանը այդ առիթով ասաց. «ՀԱՀ ողջ աշխատակազմն ու դասախոսական կազմը խիստ ոգեշնչված են բակալավր ընդունված առաջին կուրսեցիների նորամուտով: Մենք երկուսուկես տարի ջանք չենք խնայել եւ սպասել ենք այսօրվան: Սա նախկին Սովետական Միության տարածքում առաջին ամերիկյան հավատարմագրված բակալավրի ծրագիրն է, եւ մենք ինչ-որ չափով այս պահին պատմություն ենք կերտում: Ամերիկյան կրթությունը ինքնատիպ եւ կարեւոր կողմեր ունի, ինչպիսին է ակադեմիական ազատությունը, դասախոսների եւ ուսանողների ղեկավարումը եւ այլն, եւ մենք երջանիկ ենք ներմուծել այս ամենը հայկական բակալավրի ծրագրում»:
ՀԱՀ ընդհանուր կրթության բաժնի փոխդեկան Քեթրին Բոունը նշեց. «Մենք անհամբեր սպասում ենք մեր նոր ուսանողներին, եւ սա շատ ավելի փորձություն է մեզ համարՙ քան իրենց»:
