Սեւծովյան նավատորմի «Մոսկվա» հածանավը, որին ՆԱՏՕ-ն «ավիակիրների սարսափ» է անվանում, Կաբո-Վերդեի Մինդելու նավահանգիստ մտնելու փոխարեն սկսել է շարժվել դեպի Արեւելյան Միջերկրածովք: Այդ մասին սեպտեմբերի 4-ին Ինտերֆաքս գործակալությանը հայտնել է Ռուսաստանի ռազմադիվանագիտական աղբյուրներից մեկը:
«Հարկ եղավ փոքր-ինչ փոփոխել ծովուժի ջոկատի ծրագրերը: Կաբո-Վերդեի փոխարեն «Մոսկվա» հածանավը շարժվում է Ջիբրալթարի նեղուցի կողմը: Մոտավորապես տասն օրից նավը մուտք կգործի Արեւելյան Միջերկրածովք, որտեղ խաղաղօվկիանոսյան «Ադմիրալ Պանտելեեւ» հակասուզանավային մեծ ռազմանավից կընդունի ծովուժի օպերատիվ զորամիավորման առաջատարի հերթափոխը», ասել է աղբյուրը:
«Մոսկվա» հածանավը Սեւաստոպոլից դուրս է եկել հուլիսի 2-ին: Ատլանտյան օվկիանոսի հյուսիսում հածանավը սկսեց գլխավորել Սեւծովյան, Հյուսիսային եւ Բալթյան նավատորմների նավերի ու ռազմանավերի ջոկատը: Օգոստոսի սկզբներին հածանավը մտավ Կուբաՙ Հավանայի նավահանգիստ, օգոստոսի 13-ինՙ Նիկարագուայի Կորինտո նավահանգիստ, անցում կատարելով Պանամայի ջրանցքով:
Օգոստոսի 27-ին ծովուժի ջոկատը այցելեց Վենեսուելայի Լա-Գուայրե նավահանգիստ, Ատլանտյան օվկիանոսում հրաձգություն կատարեց կ-1030 «Վուլկան» գլխավոր հարվածային համալիրից:
