«Մերձավոր Արեւելքը վառոդի տակառ է»
Դամասկոսում ֆրանսիական «Ֆիգարո» թերթի հատուկ թղթակից Ժորժ Մալբրյուն բացառիկ հարցազրույց է ունեցել Սիրիայի նախագահ Բաշար Ասադի հետ: Հարցազրույցը սեպտեմբերի 3-ին կրճատումներով հրապարակվել է թերթի կայքէջում:
Թղթակիցը սկզբում հարցնում է, թե Բաշար Ասադը կարո՞ղ է արդյոք ապացուցել, որ սիրիական բանակը օգոստոսի 21-ին Դամասկոսի արվարձանում քիմիական զենք չի օգտագործել, ինչում նրան մեղադրում են Բարաք Օբաման եւ Ֆրանսուա Օլանդը:
Ասադը հայտարարում է, որ մեղադրողը պարտավոր է ներկայացնել ապացույցներ: Օբաման եւ Օլանդը չեն կարողացել ապացույց ներկայացնել նույնիսկ սեփական ժողովուրդներին: Խոսքը նման զենք ունենալ կամ չունենալու մասին չէ: «Ենթադրենք, թե մեր բանակն ուզում է զանգվածային բնաջնջման զենք օգտագործել: Արդյոք հնարավո՞ր է դա անել մի գոտում, որտեղ հենց ինքն է գտնվում, եւ որտեղ այդ զենքից զինվորներ վիրավորվեցին, ինչպես որ դա հավաստում են հիվանդանոց այցելած ՄԱԿ-ի տեսուչները: Որտե՞ղ է տրամաբանությունը», իր հերթին հարց է տալիս Ասադը:
Նրա խոսքերովՙ Մերձավոր Արեւելքը «վառոդի տակառ» է, եւ այսօր կրակը մոտենում է դրան: Հարկավոր է մտածել ոչ միայն Սիրիայի հակահարվածի, այլեւ մյուս հետեւանքների մասին: «Երբ տակառը պայթի, ամենքը կկորցնեն իրավիճակի վերահսկողությունը», ասում է նախագահը, ավելացնելով, որ քաոսն ու ծայրահեղականությունը կտարածվեն, խորացնելով տարածաշրջանային պատերազմի վտանգը:
Այն հարցին, թե Ֆրանսիան արդյոք չի՞ դարձել Սիրիային թշնամի երկիր, Ասադը պատասխանում է, որ ահաբեկիչներին ֆինանսական ու ռազմական օգնություն հատկացնող ամեն ոք Սիրիայի ժողովրդի թշնամին է: Խոսքը ոչ թե Ֆրանսիայի ժողովրդի, այլ այդ պետության քաղաքականության մասին է: Թշնամանքը վերջ կգտնի, երբ այդ քաղաքականությունը փոխվի: Հակառակ դեպքում կտուժեն Ֆրանսիայի շահերը:
