Ֆուտբոլի Հայաստանի երիտասարդական հավաքականն այսօր Ավանի ֆուտբոլի ակադեմիայում սկսում է նախապատրաստությունը հոկտեմբերի 10-ին Ֆրանսիայի եւ հոկտեմբերի 14-ին Ղազախստանի երիտասարդական հավաքականների հետ Երեւանում կայանալիք ընտրական մրցախաղերին: Ֆրանսիացիների հետ հանդիպումը տեղի կունենա «Հրազդան» մարզադաշտում եւ կսկսվի ժամը 21-ին: Իսկ ղազախներին մեր ֆուտբոլիստները կհյուրընկալեն «Հանրապետականում»: Խաղը կսկսվի ժամը 18-ին:
Հայաստանի երիտասարդական հավաքականն ընդգրկված է ընտրական 10-րդ խմբում: Մեր ընտրանին անցկացրած 2 հանդիպումներից հետո 3 միավորով 3-րդ տեղում է: Առաջատարն Իսլանդիայի հավաքականն է, որը շահել է բոլոր 4 հանդիպումները: Հաջող է մեկնարկել նաեւ Ֆրանսիայի հավաքականը, որը 2 խաղերում էլ հաղթել է:
ՀՀ հավաքականն անհաջող մեկնարկեցՙ սեփական հարկի տակ 1-2 հաշվով պարտվելով իսլանդացիներին: Իսկ 2-րդ խաղում մեր ֆուտբոլիստները հյուրընկալվելիս 1-0 հաշվով հաղթեցին ղազախներին: Վերջիններս 4 խաղից վաստակած 3 միավորով 4-րդ տեղում են:
Ֆրանսիայի հավաքականը մեկնարկային խաղում սեփական հարկի տակ 5-0 հաշվով ջախջախեց ղազախներին, ապա հյուրընկալվելիս 2-1 հաշվով պարտության մատնեց Բելառուսի ընտրանուն, որը բոլոր 4 խաղերում էլ անհաջողության է մատնվել:
Երիտասարդական հավաքականի գլխավոր մարզիչ Ռաֆայել Նազարյանը հավաքի է հրավիրել հետեւյալ 23 ֆուտբոլիստներին:
Դարպասապահներՙ Գոռ Մանուկյան («Փյունիկ»), Արսեն Բեգլարյան («Գանձասար»), Արթուր Թորոյան («Բանանց»), պաշտպաններՙ Վասպուրակ Մինասյան («Փյունիկ»), Տարոն Ոսկանյան («Փյունիկ»), Վարազդատ Հարոյան («Փյունիկ»), Գրիգոր Հովհաննիսյան («Փյունիկ»), Արման Հովհաննիսյան («Փյունիկ»), Արամ Շախնազարյան («Բանանց»), Դավիթ Մարիկյան («Շիրակ»), Ալեն Համբարձումյան («Գանձասար»), կիսապաշտպաններՙ Վահագն Այվազյան («Բանանց»), Նաիրի Մինասյան («Բանանց»), Գագիկ Պողոսյան («Փյունիկ»), Աշոտ Սարդարյան («Փյունիկ»), Աղվան Պապիկյան («Փյունիկ»), Գոռ Մալաքյան («Փյունիկ»), Դավիթ Հակոբյան («Շիրակ»), Կարեն Մուրադյան («Շիրակ»), Կարեն Հակոբյան («Շիրակ»), հարձակվողներՙ Սարգիս Բալոյան («Փյունիկ»), Վիուլեն Այվազյան («Փյունիկ»), Սարգիս Ադամյան («Հանզա», Ռոստոկ, Գերմանիա):
