Հոկտեմբերի 3-ին Արամ Խաչատրյան համերգասրահում տեղի ունեցավ ՀՀ սփյուռքի նախարարության նախաձեռնությամբ կազմակերպված «Կոմիտաս Վարդապետ» համահայկական փառատոնի փակման հանդիսավոր արարողությունը:
Միջոցառմանը ներկա էին ՀՀ առաջին տիկին Ռիտա Սարգսյանը, ՀՀ սփյուռքի նախարար Հրանուշ Հակոբյանը, պետական-հասարակական գործիչներ, Կոմիտասի արվեստի երկրպագուներ:
Հրանուշ Հակոբյանը նշեց. «Կոմիտաս Վարդապետ» փառատոնի անցկացումը նպաստեց հայկական Սփյուռքի մշակութային եւ հոգեւոր համախմբմանը Կոմիտասի արվեստի շուրջը: Այս օրերին անգամ ճապոնացու, գերմանացու եւ թուրքի շուրթերից հնչեցին Կոմիտասի ստեղծագործությունները»:
Սեպտեմբերի 26-ից մեկնարկած փառատոնի մասնակից երգչախմբերն ու անհատ կատարողները, ովքեր Երեւանում, Գյումրիում, Վանաձորում եւ Էջմիածնում ելույթներ են ունեցել տարբեր բեմերում, փակման հանդիսավոր միջոցառման ժամանակ հանդես եկան կոմիտասյան կատարումներով:
Աշխարհի 9 երկրից եւ Արցախից ժամանած մասնակիցները հիացրին հանդիսատեսին իրենց կատարումներով: Տպավորիչ ելույթով հանդես եկավ Ասուկա Յոշիզակը Ճապոնիայից, ով հազարամյա պատմություն ունեցող ճապոնական կոտո նվագարանով նվագում էր Կոմիտասից ստեղծագործություններ: Ավստրիայի ներկայացուցիչ Յուհեի Ծուչիդան կատարեց «Հով արեք, սարեր ջան» երգը: Հանդես եկան նաեւ Աննա Մայիլյանը, Շահե Քեշիշյանը Սիրիայից, Գեւորգ Հաճյանըՙ Լիբանանից, «Արարատ» երգչախումբը Իրանից, «Օվսաննա» եւ «Նորահրաշ» երգչախմբերը Ռուսաստանից: Միջոցառմանը ելույթ ունեցան նաեւ Հայաստանի պետական ազգային ակադեմիական երգչախումբը եւ ՀՀ սփյուռքի նախարարության հովանու ներքո գործող Համահայկական պատանեկան սիմֆոնիկ նվագախումբը:
Միջոցառման ընթացքում ներկայացվեց Հայկ Սայադյանի` Կոմիտասին նվիրված ալեգորիկ ֆիմը:
Հայ երգարվեստի մի խումբ նվիրյալներ իրենց վաստակի, ինչպես նաեւ «Կոմիտաս Վարդապետ» համահայկական փառատոնի կայացմանը նպաստելու համար ՀՀ սփյուռքի նախարարության ոսկե մեդալով պարգեւատրվեցին Հայաստանի պետական ազգային ակադեմիական երգչախմբի գեղարվեստական ղեկավար եւ գլխավոր դիրիժոր Հովհաննես Չեքիջյանը, «Կոմիտաս» մեդալով պարգեւատրվեցին ՀՀ ժողովրդական արտիստ Տիգրան Մանսուրյանը, ՀՀ վաստակավոր արտիստ Սարգիս Նաջարյանը, «Կոմիտաս Վարդապետ» համահայկական փառատոնի ղեկավար Սամվել Հարոյանը, Կոմիտասի անվան կոնսերվատորիայի դասախոս Կարինե Բրուտյանը: ՀՀ սփյուռքի նախարարության շնորհակալագրերով պարգեւատրվեցին Կոնսերվատորիայի ռեկտոր Շահեն Շահինյանը, համահայկական պատանեկան սիմֆոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Եսայանցը:
Փառատոնի մասնակից երգչախմբերին եւ անհատ կատարողներին տրվեցին մասնակցության հավաստագրեր եւ հուշանվերներ:
