Պրոֆեսիոնալ բռնցքամարտի 2-րդ միջինքաշային կարգում WBO-ի վարկածով աշխարհի նախկին չեմպիոն Արթուր Աբրահամը շարունակում է նախապատրաստվել հոկտեմբերի 26-ին Գերմանիայի Օլդենբուրգ քաղաքում իտալացի Ջիովանի դե Կարոլիսի հետ կայանալիք մենամարտին: Այն կհեռարձակվի գերմանական ARD եւ Հայաստանի հանրային հեռուստաընկերությունների ուղիղ եթերում:
Արթուր Աբրահամն իր մամուլի քարտուղարությանը տեղեկացրել է, որ ներկայումս իտալացի բռնցքամարտիկի ոճին համապատասխանող բռնցքամարտիկների հետ սպարինգ-մենամարտեր է անցկացնում: Նրանք Գերմանիա են ժամանել ԱՄՆ-ից եւ Ռուսաստանից: Բացի մարզումներից, Արթուրն իր մարզչիՙ Ուլի Վեգների հետ դիտում է Ջիովանի դե Կարոլիսի մենամարտերի տեսագրությունները, ուսումնասիրում է մրցակցի ուժեղ եւ թույլ կողմերը: Այդ ամենի հիման վրա Աբրահամն իր մարզչի հետ առաջիկա մենամարտի մարտավարությունը կմշակի:
Ջիովանի դե Կարոլիսը պրոֆեսիոնալ ռինգում անցկացրած 24 մենամարտերից 20-ում հաղթել է, կրել է 4 պարտություն: Արթուր Աբրահամը նրանից ավելի փորձառու է: Նա 37 մենամարտում հաղթել է, 4-ում պարտվել, մեկն ավարտել է ոչ-ոքի: Ինչպես հայտնի է, Արթուր Աբրահամը WBO-ի վարկածով աշխարհի չեմպիոնի տիտղոսի հավակնորդ է: Նրա եւ այդ տիտղոսի ներկայիս տեր Ռոբերտ Շտիգլիցի մենամարտը նախատեսվում է 2014-ին: Դա կլինի 2 բռնցքամարտիկների արդեն 3-րդ տիտղոսային մենամարտը: Առաջինում Արթուրը հաղթել էր Շտիգլիցինՙ տիրելով աշխարհի չեմպիոնի գոտուն, իսկ հաջորդ մենամարտում մրցակցին հաջողվել էր ռեւանշի հասնել ու իրեն վերադարձնել WBO-ի վարկածով 2-րդ միջինքաշային կարգում աշխարհի չեմպիոնի տիտղոսը:
