Հոկտեմբերի 15-ին Գյումրու քաղաքապետ Սամվել Բալասանյանն ընդունել է Միացյալ Թագավորության Բրիստոլ քաղաքի հոգաբարձուների եւ ճարտարապետների խորհրդի անդամ, պատմական, քաղաքացիական շենքերի պահպանման, վերականգնման եւ կառուցվածքային վերլուծության մասնագետ Քեն Բրաունին ու ամերիկացի ճարտարագետ, Միսիսիպիի համալսարանի ճարտարապետական արվեստի եւ նախագծման բաժնի պրոֆեսոր Ջեյն Բրիտ Գրինվոյին: Նրանք 2009 թվականից ուսումնասիրություններ են կատարում «Կումայրի» պատմաճարտարապետական արգելոց-թանգարանի տարածքում:
Ըստ քաղաքապետարանի պաշտոնական տեղեկատվության, քաղաքապետը, հյուրերին շնորհակալություն հայտնելով այս տարիներին կատարած աշխատանքի համար, Գյումրիում նրանց ծրագրերին աջակցելու պատրաստակամություն է հայտնել: Արտասահմանցի մասնագետները համայնքի ղեկավարին տեղեկացրել են, որ ցանկանում են «Կումայրի» արգելոցի տարածքում գտնվող Շչորսի 2 հասցեի շենքում վերանորոգումից հետո ճարտարապետության մասնագիտացված դպրոց հիմնել: Նրանց ծրագրով նախատեսվում է արդեն 2014 թվականի գարնանը օտարերկրյա կամավորների եւ ուսանողների ներգրավել այդ աշխատանքներում, հետագայում հրավիրվելու են մասնագետներ ինչպես շենքի վերականգնմանը մասնակցելու, այնպես էլ ճարտարապետության ապագա դպրոցում դասավանդելու, միջազգային նման դպրոցների փորձը Գյումրիում ներդնելու համար: Աշխատանքների մեկնարկին ֆինանսական աջակցություն ստանալու նպատակով հյուրերը դիմելու են Հուշարձանների պահպանության համաշխարհային հիմնադրամին:
Գյումրու քաղաքապետը, վերահաստատելով ծրագրի իրագործմանն աջակցելու պատրաստակամությունը, արտասահմանցի մասնագետներին առաջարկել է նախնական նախագիծ ներկայացնել, որպեսզի հնարավոր լինի ըստ անհրաժեշտության 2014 թ. համայնքային բյուջեից գումարներ նախատեսել տարածքի նախապատրաստման եւ որոշ սկզբնական աշխատանքների համար:
