Այսօր արցախցի Հելեն Դադայանի հոգեհանգիստն էր։
Հելենը օգոստոսի 14-ին Արևմտյան Հայաստանից վերադառնալիս Գյումրի-Երևան ճանապարհին ավտովթարից է մահացել։ Նրա մարմինը 44 օր Գորիսի դիահերձարանում էր։ Ադրբեջանցիները թույլ չէին տալիս անցկացնել ու հասցնել Արցախ։
Հելենի հարազատները բաց նամակներով դիմել են Կարմիր խաչին, միջազգային կառույցներին, որպեսզի նրանք միջամտեն, ստիպեն Ադրբեջանին թույլատրել Հելենի դին Հայաստանից տեղափոխել Արցախ՝ Ճարտար գյուղ, որտեղ պատանդի կարգավիճակում 9 ամիս ապրում էին աղջկա հարազատներն ու 120 հազար արցախցիները։
Հելենի ընտանիքը մինչև Ստրասբուրգ, մինչև Կարմիր խաչի միջազգային կոմիտե է դիմել. ապարդյուն։
Ադրբեջանական կողմը պահանջել է, որ փաստաթղթերում նշվի, որ Հելեն Դադայանի մարմինը Հայաստանից տեղափոխվում է ոչ թե Արցախ, այլ Ադրբեջանի Հանրապետություն։
Հելենի հարազատները բռնի տեղահանվողների քարավանի հետ սեպտեմբերի 27-ին եկել են Հայաստան։
9 ամիս Հելենն ապրեց կարոտը սրտում, ծնողների հետ միայն հեռախոսով կապվելով, հետո օգոստոսին մեկնեց Արևմտյան Հայաստան, որպեսզի մղձավանջից մի քիչ ցրվի, միտքն ուրիշ բանով զբաղեցնի, բայց… ողբերգական ավտովթար։
44 օր մայրն ու հայրը երազում էին գոնե իրենց դստեր մարմինը տեսնել, նրան հայրենի Ճարտարում հուղարկավորել։
Անքննելի են Աստծո ճանապարհները։
Հելենը չգնաց Արցախ, նրա ծնողներն ու ամբողջ Արցախը եկան Հայաստան։
Հելեն Դադայանը կհուղարկավորվի Երևանում։
