Հակակոռուպցիոն դատարանում սահմանադրական կարգի ենթադրյալ տապալման՝ հակասահմանադրական ճանաչված գործով դատական նիստի ժամանակ դատավոր Սարգիս Պետրոսյանն արգելեց քննարկել Փաշինյանի սպառնալիքներն ուղղված ՀՀ երկրորդ նախագահ Ռոբերտ Քոչարյանին՝ անվանելով դրանք քաղաքական հայտարարություններ։
Ի պատասխան՝ փաստաբան Արամ Օրբելյանը պահանջեց չքննարկել 2008 թվականին հնչած քաղաքական հայտարարությունները։
Արամ Օրբելյանը հիշեցրեց այն սպառնալիքները, որոնք նախըտնրական քարոզարշավին հնչեցրել է Նիկոլ Փաշինյանը։
«Սատկացնելու եմ…»,-փորձեց թվարկել Արամ Օրբելյանը, երբ դատավոր Սարգիս Պետրոսյանն ընդհատեց ու հորդորեց քաղաքական բաներ չասել։
«Ինձ է վերաբերում»,-միջամտեց Ռոբերտ Քոչարյանը։
«Հանցանքի մասին, պարոն Քոչարյան, հաղորդում ներկայացրեք։
Որևէ քաղաքական անձի մասին արված հայտարարություն արգելում եմ իմ դահլիճում ասել»,-ասաց դատավորը։
Արամ Օրբելյանն ի պատասխան հայտարարեց՝ 100 տոկոսվ համաձայն է դատավորի հետ, քաղաքական հայտարությունները, այդ թվում՝ ՀՀ երկրորդ նախագահի կողմից արված, չպետք է քրեադատավարական կարգով քննության առարկա դառնան։
«Հենց դա էի ուզում ասել, հարգելի դատարան, Ձեզ հետ 100 տոկոսով համաձայն եմ, կիրառեք քրեադատավարական օրենսգիրքը, որպեսզի այն քաղաքական հայտարարությունները, որոնք հնչել են 2008 թվականին, սույն դատարանում քննարկման առարկա չդառնան»,-ասաց Արամ Օրբելյանը։
«Հետաքրքիր է՝ եթե ես ասեի «սատկացնելու եմ», հաստատ ինձ հաջորդ օրը կկալանավորեին»,-այդ ընթացքում հայտարարեց Ռոբերտ Քոչարյանը։
