Առողջության համընդհանուր ապահովագրության վճարի չափը, որը կազմում է 129 հազար դրամ, բոլոր խմբերի համար նույնական է և ամրագրված օրենքի համապատասխան դրույթով: Այս մասին այսօր կայացած մամուլի ասուլիսի ժամանակ նշեց ՀՀ առողջապահության նախարար Անահիտ Ավանեսյանը։
Խոսելով ապահովագրավճարի չափի վերանայման հավանականության մասին՝ նա նշեց, որ այդ գործընթացի մեխանիզմները ևս ամրագրված են օրենքով։
«Ամեն տարի հաջորդ տարվա համար ԱԺ-ին Առողջապահության նախարարը ներկայացնում է Ապահովագրության հիմնադրամի կողմից կազմված զեկույց՝ սպառված ծառայությունների, մատուցված ամբողջ ծավալների, կանխատեսումների, գների փոփոխության և այլնի մասին։ Այսինքն՝ ներկայացվում են նախորդ տարվա արդյունքները, և առաջարկ է ներկայացվում արդեն հաջորդ տարվա ապահովագրավճարի վերաբերյալ։ Ամեն տարի ԱԺ-ն պետք է որոշում կայացնի թողնելո՞ւ է նույնը, բարձրացնելո՞ւ է, թե նվազեցնելու է ապահովագրավճարը»,- հստակեցրեց Ավանեսյանը։
նախարարը միաժամանակ տեղեկացրեց, որ առաջիկա ամսվա ընթացքում ֆինանսական հատվածի գործընկերների հետ քննարկումներ են սկսելու 2027 թվականին առողջության ապահովագրության պետական սուբսիդավորման վերաբերյալ։
«Առաջիկա 1-2 ամսվա ընթացքում պատկերը կհստակեցվի՝ թե 2027 թվականի ընթացքում պետությունն ինչքան է սուբսիդավորելու այն խմբերին, որոնց ամբողջությամբ չի սուբսիդավորում»,-ասաց Ավանեսյանը։
Նա ընդգծեց, որ ապահովագրավճարի չափի վերանայման դեպքում այն կտարածվի բոլոր շահառու խմբերի վրա։
