Ալավերդիում անցկացվեց հանդբոլի պատանեկան մրցաշար, որը նվիրված էր հայկական հանդբոլի երախտավոր Օլեգ Գորբունովի հիշատակին: Մրցումներն անցկացվեցին նրա անվան համալիր մարզադպրոցի դահլիճում: Մրցասպարեզ դուրս եկած 4 թիմերի մրցավեճում հաջողությունն ուղեկցեց Վանաձորի հավաքականին: Վանաձորցիները մրցումների առաջին օրը 25-19 հաշվով հաղթեցին Ալավերդու 1-ին հավաքականին, ապա պարտության մատնեցին Աջափնյակի թիմին (26-15): Ալավերդու 2-րդ հավաքականն էլ չկարողացավ լրջորեն դիմակայել վանաձորցիներինՙ պարտվելով 18-26 հաշվով: 2-րդ տեղը գրավեց Ալավերդու 1-ին հավաքականը, որը պարտության մատնեց իր համաքաղաքացիներին (29-18) եւ Աջափնյակի թիմին (28-22): Հաջորդ տեղերը գրավեցին Աջափնյակի եւ Ալավերդու 2-րդ հավաքականները:
Մրցումների արդյունքներն ամփոփվեցին մրցաշարի փակման արարողության ժամանակ, որին ներկա էր նաեւ Ալավերդու քաղաքապետ Արտավազդ Վարոսյանը: Նա պարգեւներ հանձնեց մրցանակակիրներին, մրցաշարի լավագույն հանդբոլիստ ճանաչված Ալավերդու 1-ին հավաքականի խաղացող Արթուր Պապոյանին:
