ՀԱՅԱՍՏԱՆԻ ԴՐՈՇԸ ՅԵՆԱՅՈՒՄ ՀԻՇԵՑՆԵԼՈՒ Է ԳԵՐՄԱՆԻԱՅԻ ՄԵՂՍԱԿՑՈՒԹՅԱՆ ՄԱՍԻՆ

ԱՆԱՀԻՏ ՀՈՎՍԵՓՅԱՆ, Գերմանիա

Գերմանական Յենա քաղաքում հինգշաբթի ապրիլի 24-ին կբարձրացվի Հայաստանի պետական խորհրդանիշըՙ եռագույն դրոշըՙ ի հարգանս 1915-ի Հայոց ցեղասպանության հիշատակի օրվա, ապրիլի 23-ին իրազեկում է տեղական հեռուստատեսությունը: Թյուրինգենում գտնվող105463 բնակիչ ունեցող Յենա քաղաքը հայտնի է իր համալսարանով: Քաղխորհրդի շենքի վրա Հայաստանի դրոշի մեկօրյա ներկայությունը խորհրդանշելու է Գերմանիայի մեղսակցության մասին, հաղորդել է Յենայի քաղաքապետ դոկտոր Ալբրեխտ Շրյոթերըՙ հավելելով, թե դրանից բացի այն հանրության ուշադրությունն է բեւեռելու այն փաստի վրա, որ օսմանյան կայսրության իրավահաջորդը մինչեւ օրս հրաժարվում է ճանաչել հայ ժողովրդի դեմ իրականացրած ոճիրն իբրեւ ցեղասպանություն: Գերմանական տարբեր քաղաքներում հայ համայնքի ջանքերով ապրիլի 24-ին տեղի կունենան հիշատակի արարողություններ: Ինչպես նախորդ տարիներին, այնպես էլ 99-ամյա տարելիցին գլխավոր հուշահանդեսները կմատուցվեն Բեռլինումՙ ժամը 19-ին Ֆրանսիական տաճարում, Մայնի Ֆրանկֆուրտումՙ ժամը 19.15-ին սուրբ Պողոսի տաճարում, Քյոլնումՙ ժամը 19-ին սուրբ Սահակ-Մեսրոպ եկեղեցում: