ՀՀ պետբյուջեից սնուցվող «փիար» կոմպանիա

Ապրիլի 13-ին Կառավարության նիստում որոշում կայացվեց պետբյուջեից Երեւան քաղաքին հատկացնել 10 միլիարդ դրամ:

Այդ գումարով այս տարի, Երեւանում կապիտալ ծախսեր են իրականացվելու:
Եվս մեկ անգամ ընդգծենք՝ այս տարի շռնդալից իրականացվելու են շինարարական, բարեկարգման մեծածավալ ծրագրեր:

Ինչո՞ւ Կառավարությունն այդ ծրագրերի համար Երեւանին 10 միլիարդ դրամ չի տրամադրել, օրինակ, անցյալ կամ նախորդ տարի՝ Հայկ Մարությանի պաշտոնավարման ընթացքում, կամ՝ 4 ամիս առաջ, երբ Հրաչյա Սարգսյանն էր քաղաքապետը:

Որովհետեւ առջեւում Երեւանի ավագանու, ավելի հասկանալի լեզվով ասած՝ քաղաքապետի թեկնածու Տիգրան Ավինյանի ընտրություններն են:

Սրա անունը կոռուպցիա կարելի՞ է դնել, թե՞ ասենք՝ պետական խոշոր գումարի ուղղում՝ հանուն  մեկ անձի «փիարի»: Թե՞ երկուսը միասին:

Փաստորեն, ՀՀ քաղաքացիների հարկերից 10 միլիարդ դրամ հատկացվում է  Երեւանի բյուջեին, որպեսզի ընտրություններից 4-5 ամիս առաջ նախ թմբկահարվի, թե ո՞ր վարչական շրջանում ի՞նչ աշխատանքներ են նախատեսվում, հետո այդ աշխատանքներն իրականացվեն՝ որպես Ավինյանի նախընտրական քարոզարշավին խիստ նպաստող բաղադրիչ:

10 միլիարդանոց ծրագրերը նախատեսված են գրեթե բոլոր վարչական շրջաններում: Փոխքաղաքապետ Լեւոն Հովհաննիսյանը հայտարարեց, որ դրանք բոլորն իրականացվելու են հենց այս տարի: Իսկ քանի որ շինարարության, կառուցապատելու լավագույն  շրջանն ամառն է, երբ ձյուն, անձրեւ, ցուրտ չի լինում, այդ ժամանակահատվածը, արի ու տես, որ  համընկնում է քաղաքապետի թեկնածու Ավինյանի պաշտոնապես չհայտարարված, բայց վաղուց արդեն իր հունի մեջ գտնվող քարոզարշավի ժամանակաշրջանի հետ: Չնայած՝ Ավինյանն իր «փիարն» սկսել է դեռեւս Սուրմալուի տոնավաճառի պայթյունի օրերին, երբ իր ամբողջ հմայքով ելույթ ունեցավ մոխրացած ավերակների համայնապատկերին:

Եվ այսպես, 10 միլիարդից շուրջ 4,7 միլիարդ դրամը հատկացվելու է բազմաբնակարան շենքերի հին վերելակները նորերով փոխարինելու ծրագրին:

Այդ շենքերի բնակիչների գոնե մի մասը պոտենցիալ  Ավինյան ընտրող կդառնա:
522 միլիոն դրամով  Նոր Խարբերդ թաղամասում 10,6 կմ երկարությամբ գազատար է կառուցվելու, ինչպես նաեւ՝ գազաբաշխիչ կայան, որը գտնվելու է Մասիս խոշորացված համայնքի տարածքում:

Նոր Խարբերդում 250 տուն կապահովվի գազով, որը կազմելու է թաղամասի 10 տոկոսը: Հետագայում Նոր Խարբերդի գազաֆիկացումը կշարունակվի: Այսինքն՝ Ավինյանը Նոր Խարբերդում ունի պոտենցիալ 250 տան քվե. եթե ամեն տուն միջինն ունենա 4 բնակիչ, այստեղից նա կստանա 1000 ձայն: Ուշադրություն. նրանք Նոր Խարբերդի 10 տոկոսն են միայն, մնացած 90 տոկոսը եւս պոտենցիալ Ավինյան ընտրողներ են, որպեսզի իրենց տներում էլ մի գեղեցիկ օր գազ քաշվի:

Դավթաշենի 1-ին եւ 2-րդ թաղամասերի միջեւ 17.000 քմ ընդհանուր մակերեսով կենտրոնական այգին հիմնանորոգվելու է 632 միլիոն դրամով:

Նոր Նորրք  վարչական շրջանի այգին նույնպես հիմնանորոգվելու է՝ ոռոգման համակարգ, լուսավորության ցանց, շատրվաններ, պոմպակայան. ծախսվելու է 578 միլիոն դրամ:
Սուրբ Գրիգոր Լուսավորիչ եկեղեցու հարակից տարածքն է բարեկարգվելու, շատրվաններ են կառուցվելու: 352 միլիոն դրամ արժողությամբ նախագծով 3.200 քմ մակերեսով տարածքում կառուցվելու են շատրվաններով ավազան, ոռոգման համակարգ, ստորգետնյա պոմպակայան, լուսավորության համակարգ:

Երևանի վարչական տարբեր շրջաններում 3 մանկապարտեզ, 2 պոլիկլինիկա  է հիմնանորոգվելու՝ շուրջ 700  միլիոն դրամ ընդհանուր արժողությամբ:
Ճանապարհներ են կառուցվելու գրեթե բոլոր վարչական շրջաններում: Առանձին ծրագրով կկառուցվեն կոյուղատարներ:

Այս ամենից բացի,Կառավարությունը ՀՀ պետբյուջեից  487 միլիոն դրամ էլ ուղղելու է Մետրոպոլիտենի ենթակառուցվածքների արդիականացմանը:

Այս ամենի մասին խոսվելու է, կասկած չկա, որ Ավինյանի միանձնյա մասնակցությամբ  տեսահոլովակներ են ցուցադրվելու, իսկ շինարարական աշխատանքները երեւանցիները սեփական աչքերով են տեսնելու, ու օրհնեն Ավինյանին, օրեր հաշվեն, թե երբ է գալու սեպտեմբերը՝ ընտրության օրը, որ գնան ու հոգով-սրտով նրան ընտրեն:

Ու երեւանցիների 99 տոկոսին չի հետաքրքրելու՝ ինչ փողերով են այդ աշխատանքներն արվում, ինչո՞ւ է հենց հիմա՛ ՀՀ պետբյուջեից 10 միլիարդ գումար դուրս գրվել ու հատկացվել Երեւանի կապիտալ շիննախագծերին, հազար տարի մնա, նրանց պետքն էլ չէ հարցնեն՝ ինչո՞ւ հենց 2023-ի այս ամիսներին եւ ոչ, ասենք, 2022-ի ամռանը:

99 տոկոսին չի էլ հուզում, որ պետական գումարներ են ծախսվում քաղաքական քարոզչության, մեկ անձի  վարկանիշը բարձրացնելու, երեւանցիների աչքը մտնելու համար, որ դա հետո վերածվի քվեի:

Զարմանալու ոչինչ չկա, չէ՞ որ Փաշինյանն ինքն է ասուլիսի ժամանակ  հայտարարել. «Երեւանի ավագանու ընտրությունները քաղաքական ընտրություններ են. իմ քաղաքական թիմն է այդ պարտականությունը ստանձնել»:

ՆԱԻՐ ՅԱՆ