Եվրոհանձնաժողովի նախագահ Ժան-Կլոդ Յունկերը ԵՄ երկրներին կոչ է արել ստեղծել համաեվրոպական բանակ: Այդ մասին հաղորդում է գերմանական «Welt am Sonntag» թերթը:
«Նման բանակը մեզ կօգներ ձեւավորելու ընդհանուր արտաքին քաղաքականություն եւ անվտանգության քաղաքականություն, ինչպես նաեւ ապահովելու միասնական Եվրոպայի պատասխանատվությունն աշխարհի իրադարձությունների համար», հայտարարել է Յունկերը:
Եվրոհանձնաժողովի ղեկավարը գտնում է, որ Եվրոպան այդ ձեւով Ռուսաստանին կցուցադրի իր լուրջ վերաբերմունքը Եվրոմիության արժեքների պաշտպանության նկատմամբ: Նրա խոսքերով, համաեվրոպական բանակը նաեւ ողջ աշխարհին ցույց կտա, որ ԵՄ երկրների միջեւ երբեք պատերազմ չի լինելու:
Գերմանական թերթի տվյալներով, Բունդեսթագի պատգամավորները հավանություն են տվել Յունկերի առաջարկությանը:
Համաեվրոպական բանակի ստեղծման նպատակահարմարության մասին ավելի վաղՙ մարտի 6-ին խոսել է Գերմանիայի պաշտպանության նախարար Ուրսուլա ֆոն դեր Լայենը: Նրա խոսքերովՙ դա թույլ կտա անվտանգության ոլորտում ամրապնդել ԵՄ քաղաքականությունը ուկրաինական եւ նույնատիպ ճգնաժամերի պայմաններում:
Գերմանիայի պաշտպանական գերատեսչության ղեկավարն ավելացրել է, որ նման ծավալուն նախագծի իրականացման համար զգալի ժամանակ կպահանջվի:
Եվրոմիության միասնական բանակի ստեղծման օգտին հանդես է եկել նաեւ Ֆինլանդիայի նախագահ Սաուլի Նիինիստեն:
