Բժշկական զբոսաշրջություն նշանակում է որոնել եւ գտնել հարմար եւ մատչելի բուժական գործընթացներ այլ երկրներում, եթե քո երկրում դրանք կամ բացակայում են, կամ էլ գոյություն ունեն, բայց շատ թանկ են: Մինչ այժմ ավանդական վայրեր էին համարվում Մեքսիկան, Կոլումբիան եւ Տաիլանդը: Վերջերս դրանց լրացնելու են եկել նաեւ Արեւելյան Եվրոպայի նորանկախ երկրները: Դրանք այսպես կոչված նոր շուկաներ են բժշկական առումով եվրոպացիների, ամերիկացիների եւ ռուսների համար:
2011 թվից Հայաստանում ապրող Րաֆֆի Էլիոտը կես իռլանդացի է, կես հայ: Ավարտել է Օտտավայի համալսարանի քաղաքագիտության ֆակուլտետը: Աշխատակցել է Բրյուսելում գործող «Գաղափարների շտեմարան» (think tank) հաստատության Հայաստան-Եվրոմիություն հարաբերությունների բաժնում: Երեւանում հաստատվելու նպատակն է զարկ տալ բժշկական զբոսաշրջությանը Հայաստանում: Նա խոստովանում է, որ տեղեկատվական տեխնոլոգիաները շատ արագ են զարգանում Հայաստանում, եւ որ նպաստավոր պայմաններ են ստեղծված սկսնակ ձեռնարկատերերի համար: «Այդ բոլորին գումարածՙ հմուտ բժիշկների եւ առաջնակարգ բժշկական սարքավորումների առկայությունը մեծապես նպաստում են Հայաստանը բժշկական զբոսաշրջության գրավիչ կենտրոն դարձնելուն», գտնում է նա:
Ըստ «Արմինյն Միրոր-Սփեքթեյթր» շաբաթաթերթի, Էլիոտը մշակել է «Բուժվիր» (GetTreated) ծրագիրը, որը հնարավորություն է տալիս օտարերկրացիներին կամ սփյուռքահայերին բուժման ամենատարբեր փուլերը (խորհրդակցություն բժշկի հետ, վիրահատության օրերի ճշտում, թռիչքի տոմսերի եւ հյուրանոցային համարների ապահովում, եւ այլն) կազմակերպել առ-ցանց: Ըստ նրա, «GetTreated»-ը բժշկական զբոսաշրջության համար այն է, ինչ «Expedia.com»-ը արձակուրդային փաթեթների համար:
Ծրագիրը անցյալ տարվա վերջերին մասնակցել է Դուբլինում (Իռլանդիա) կայացած «web-Summit»-ին եւ արժանացել մրցանակի:
«Դրանով մենք փորձում ենք երկրի հեղինակությունը բարձրացնել եւ միաժամանակ առիթ ենք տալիս հայ բժիշկներին միջազգային ասպարեզ դուրս գալ: Իսկ սփյուռքահայերի համար դա հիանալի առիթ է իրենց ներդրումը ունենալու Հայաստանի բարգավաճմանը», նշում է Էլիոտը:
Հավելյալ տեղեկությունների համար այցելել www.gettreated.co կամ ֆեյսբուքի «GetTreated Medical Travel» էջը:
