Երեք ականավոր հայերՙ Ռուբեն Վարդանյանը, Վարդան Գրիգորյանը եւ Նուբար Աֆեյանը մարտի 10-ին Նյու Յորքում նախաձեռնել են «100 կյանք» նախագիծը, որը կարեւորելու եւ ճանաչելի է դարձնելու այն անհատների գործունեությունը, որոնք պայքարել են աշխարհը դրականորեն վերափոխելու համար: Նախագիծը այդ բարեգութ, խիզախ, նպատակասլաց եւ հանուն համոզմունքների ռիսկի ենթարկվելու պատրաստ մարդկանց հնարավորություն է ընձեռելու շարունակելու իրենց գործը պարգեւելով նրանց «Ավրորա» մրցանակըՙ մեկ միլիոն դոլարի չափով: Մրցանակի անվանումը ընտրվել է ի պատիվ Ավրորա (Արշալույս) Մարտիկանյանի, որը մանուկ հասակում դարձել է Հայոց ցեղասպանության ականատեսը: Հին Հռոմում «Ավրորան» արշալույսի աստվածուհին էր: Մրցանակն էլ երախտիքի մի ճառագայթ է հանուն մարդասիրության:
Թեկնածուների առաջադրման փուլը սկսվում է հունիսի 10-ին եւ ավարտվում 2015 թվի դեկտեմբերի 1-ին: Մրցանակին արժանացողի անվան հայտարարությունը տեղի է ունենալու 2016-ի ապրիլի 24-ին: Ընտրող հանձնաժողովի կազմում ընդգրկված են Էլի Ուիզելը (մարդասիրական «Elie Wiesel Foundation» հիմնադրամի նախագահ, Նոբելյան մրցանակակիր), Հինա Ջիլանին (Մարդու իրավունքների պաշտպանության ոլորտում ՄԱԿ-ի գլխավոր քարտուղարի նախկին հատուկ ներկայացուցիչ), Վարդան Գրիգորյանը (Նյու Յորքի Կառնեգի կորպորացիայի նախագահ, նախաձեռնության համահիմնադիր) եւ Ջորջ Քլունին («Not On Our Watch» մարդասիրական նախագծի համահիմնադիր, դերասան եւ կինոարտադրող):
Նկար 1. Ձախից աջ` Նուբար Աֆեյան, Ջորջ Քլունի, Ռուբեն Վարդանյան, Վարդան Գրիգորյան
