Ազգային ժողովը գումարեց ու ավարտեց քառօրյա նիստերը: Իշխանության օրակարգը մերժող ու իբրեւ թե սեփականով խորհրդարանական նիստերին մասնակցող ընդդիմադիր երկու խմբակցությունները թե՛ մասնակցեցին, թե՛ հարցեր ուղղեցին մեծամասնության իրենց գործընկերներին՝ ամենատարբեր հարցերի ու նախագծերի վերաբերյալ: Թեեւ խորհրդարանի դահլիճում, միջանցքներում միմյանց հետ շփվում, երբեմն անգամ սրճում են իշխանության ու ընդդիմաության ներկայացուցիչները, միեւնույնն է՝ «Հայաստան» խմբակցության պատգամավոր, դաշնակցական պատգամավոր Իշխան Սաղաթելյանը վստահեցնում է՝ պայքարը չի ավարտվել, ավելին՝ նոր, առավել հուժկու թափով են փողոց դուրս գալու: Փաստորեն՝ փորձ համար երրորդ:
Քաղաքագետ Գագիկ Համբարյանն ասում է՝ պետք է խոստովանել, որ, այո, խորհրդարանական ընդդիմությանը չի հաջողվում գեներացնել բոլոր ուժերն ու փողոցում, հանրության լայն զանգվածների աջակցությամբ, կարողանալ հասնել իշխանությունների հրաժարականին: Իշխանափոխության հնարավորություն, նրա կարծիքով, 2020-ի նոյեմբերի 9-ի տխրահռչակ հայատարարությունից հետո կարող էր լինել, ինչը սակայն տեղի չունեցավ:
«Ի դեպ, Ադրբեջանի նախագահ Իլհամ Ալիեւը Մյունխենի անվտանգության համաժողվի ժամանակ հստակ նշեց, որ Հայաստանի ժողովուրդն անձամբ է ընտրել կապիտուլացվելու ճանապարհը, հետեւաբար ինքն էլ պետք է կրի դրանից առաջացող հետեւանքները: Հայաստանն այժմ ինքնահոսի վիճակում է, ու շատ դեպքերում մենք ոչ թե սեղանի շուրջը, այլ՝ սեղանի վրա ենք, այսինքն՝ աշխարհի ու տարածաշրջանի գերտերությունները հենց մեր հաշվին են լուծում իրենց հարցերը»,- «Ազգ»ի հետ զրույցում ասում է քաղաքագետը:
Մեր զրուցակցի համոզմամբ՝ Արցախում այսօր տիրող ներքաղաքական իրավիճակն ուղիղ կապված է հայաստանյան իշխանությունների կողմից տարվող պրոթուրքական քաղաքականության հետ, ինչի անմիջական կրողն Արցախի նախագահ Արայիկ Հարությունյանն է: Դրա վառ օրինակն, ասում է, Ռուբեն Վարդանյանին պետական նախարարի պաշտոնից հեռացնելն էր, ինչն Ադրբեջանի պահանջներից էր: «Ստեփանակերտը, Երեւանի ակտիվ ջանքերի շնորհիվ, այդ պահանջը բավարարեց, ինչն ապացույցն է այն բանի, թե ինչ թույլ ու խայտառակ վիճակում ենք գտնվում, եւ Ադրբեջանն ուղղակիորեն, բացահայտ կերպով խառնվում է Արցախի ներքաղաքական հարցերին: Կարծում եմ՝ Վարդանյանի հեռացումը դոմինոյի էֆեկտ է ունենալու առաջիկայում: Սրան զուգահեռ՝ վտանգավոր եմ համարում Սամվել Բաբայանի՝ Արցախում հայտնվելը: Արցախի այսօրվա թույլ վիճակից օգտվելով՝ Բաքուն բոլորին պարտադրում է հեռու մնալ Արցախից, որպեսզի ազատորեն ու անկաշկանդ ճզմի արցախահայությանն ու Արցախը Նախիջեւանի վերածի»,- նշում է Համբարյանը:
Անդրադառնալով Ազգային ժողովի խոսնակ Ալեն Սիմոնյանի այն հայտարարությանը, թե անկախությունից ի վեր ամենամոտն ենք հայ-թուրքական հարաբերությունների ինչ-որ չափով կարգավորմանը, քաղաքագետ Համբարյանը նկատում է՝ Հայաստանի երրորդ Հանրապետության պատմության մեջ Հայաստանն այսքան թույլ ու նսեմացված երբեք չի եղել, որ ընդունի Թուրքիայի՝ շանտաժով առաջ բերվող նախապայմանները: «Այո, պետք է ընդունել, որ Հայաստանի այսօրվա իշխանությունն, ի դեմս Նիկոլ Փաշինյանի, մեծ հաճույքով ամեն բան անում է, որպեսզի բավարարի թուրք-ադրբեջանական տանդեմի, եւ, առաջին հերթին, Անկարայի բոլոր թելադրանքները՝ Թուրքիայի հետ հարաբերությունները կարգավորելու համար: Ի դեպ, թե՛ Ադրբեջանի, թե՛ Թուրքիայի հետ բանակցություններն իշխանությունները գաղտնի են պահում, իսկ եթե գաղտնի են պահում, նշանակում է՝ օրվա իշխանությունները Հայաստանի ու հայ ժողովրդի թիկունքում են գործում, եւ, հատեւաբար, վախենալու բան ունեն»,- ամփոփում է «Ազգ»ի զրուցակիցը:
ՍԵՎԱԿ ՎԱՐԴՈՒՄՅԱՆ
