Անգլերեն բնագրից թրգմ.ըՙ Հ.Ծ.-ի
Արձագանքելով ապրիլյան քառօրյա պատերազմի ժամանակ զոհված եւ վիրավորված ընտանիքներին նյութական եւ բարոյական օժանդակություն ցուցաբերելու ՀԲԸՄ-ի կոչին, տարբեր վայրերից հավաքագրված եւ կազմակերպության Տնօրենների կենտրոնական վարչության կողմից հատկացված գումարը կազմել է 325 հազար ամերիկյան դոլար, որը շարունակում է ավելանալ: Համընդհանուր ջանքերով ձեռք բերված գումարի մի մասը ՀԲԸՄ-ի Հայաստանյան գրասենյակի աշխատակիցները մայիսի 13-ին տրամադրել են Շիրակի եւ Արարատի մարզերից զոհված եւ ծառայությունից արձակված զինվորների ընտանիքներինՙ յուրաքանչյուրին հազարական դոլար: Նրանք այցելել են նաեւ ծանրորեն վիրավորված զինվորներին եւ կամավորներին, որոնք գտնվում են Երեւանի Կարմիր խաչի կենտրոնական կլինիկական զինվորական հոսպիտալում եւ վերականգնողական կենտրոնում եւ զորակցություն հայտնել քաջարի մարտիկներին:
Մայիսի 21-ին եւ 22-ին նույն խումբը մեկնել է Լեռնային Ղարաբաղ, որտեղ այցելելով Ստեփանակերտի զինվորական հոսպիտալը եւ Մարտակերտի, Մարտունու եւ Հադրութի շրջաններից զոհված զինվորների ընտանիքներին, զորակցություն հայտնել եւ դարձյալ 1000-ական դոլարի ֆինանսական օժանդակություն ցուցաբերել յուրաքանչյուր ընտանիքի: ՀԲԸՄ-ի հայաստանյան մասնաճյուղի փոխտնօրեն Հովիկ Էօրդեկյանը հանդիպելով Արցախի վարչապետ Արայիկ Հարությունյանի հետՙ ներկայացրել է ՀԲԸՄ-ի նախաձեռնած օժանդակության արշավի ուղղությունները, որոնց մեջ մտնում են նաեւ, բացի նյութական հատկացումներից, բժշկական սարքավորումների, ինտենսիվ թերապիայի պարագաների եւ շարժական ռենտգեն ապարատների ձեռքբերումը:
ՀԲԸՄ-ն օգնություն է ցուցաբերել նաեւ Ստեփանակերտի «Նաիրի» հյուրանոցում ապաստանած ավելի քան 70 տեղահանված ընտանիքների:
Այլ բարեգործական կազմակերպությունների հետ, ինչպիսիք են «Ռիպատ Արմենիան» («Վերադարձ Հայաստան»), «Սահման» եւ «Արար» հիմնադրամը, ստեղծվել է «Համագործակցության խումբ», որը կանոնավոր հանդիպումներ է ունենում ճշտելու համար կարիքների առաջնահերթությունները: Արցախի օգտին մարդասիրական շտապ նվիրատվություններ կատարել ցանկացողներին ՀԲԸՄ-ն կոչ է անում այցելել «https://donate.agbu.org/pages/nkr-relief» կայքը:
