Անցյալ շաբաթավերջին Գերմանիայի Դրեզդեն քաղաքը դարձել էր փակ գոտի: Դրեզդենի նշանավոր օպերային թատրոնի մոտ գտնվող Taschenbergpalais շքեղ հյուրանոցը շրջափակված էր երկաթյա ցանկապատով: Մոտակայքում ցույցերը եւ մարդկանց մեծ կուտակումներն արգելված էին: Հարյուրավոր ոստիկաններ կարող էին ստուգել կասկածելի անցորդներին: Պատճառն այն է, որ Բիլդերբերգյան ակումբի կամ «Համաշխարհային կառավարության» հերթական հանդիպման վայր էր ընտրված Սաքսոնիայի մայրաքաղաքը:
Ակումբի ամենամյա կոնֆերանսները հանդիսանում են «այս աշխարհի ուժեղների» դռնփակ հանդիպումներ: Դրանց մասնակցում են միայն նրանք, ովքեր մարմնավորում են իշխանությունը, քաղաքականությունը, տնտեսությունը, հաղորդակցությունները: 1954 թ. հոլանդական «Բիլդերբերգ» հյուրանոցում ծնունդ առած ակումբը Դրեզդենում էր անցկացնում իր 64-րդ համաժողովը, որը, ինչպես նախորդները, պարուրված էր գաղտնիության ու խորհրդավորության քողածածկույթով: Մամուլի ներկայացուցիչներին արգելված է ներկա գտնվել քննարկումներին: Թեմաները կարելի է նշել, բայց կոնկրետ կարծիքների հրապարակումը չի թույլատրվում: Կոնֆերանսներում արձանագրություններ չեն կազմվում, որոշումներ չեն ընդունվում, քվեարկությունների կամ հայտարարությունների մասին նույնպես չի խոսվում:
Այս ամենն առաջացնում է բազմաթիվ ենթադրություններ, թե ընտրյալների նեղ շրջանակում ձեւավորվում են կարծիքներ, որոնք հետագայում հսկայական ազդեցություն են գործում քաղաքական, տնտեսական ու հասարակական գործընթացների վրա: Գերմանիայում հանրահայտ է դարձել Գերհարդ Վիշնեւսկու «Իշխանության բիլդերբերգյան պարագլուխները» գիրքը, որտեղ խոսվում է «տնտեսության, քաղաքականության եւ լրատվամիջոցների վերնախավի դավադրության» մասին: Անշուշտ, «պարագլուխները» դա ժխտում են: Մասնավորապես, կոնֆերանսների կազմկոմիտեի նախագահ, ֆրանսիական AHA ապահովագրական կոնցեռնի ղեկավար Անրի դը Կաստրին դրեզդենյան հանդիպման նախօրեին տված հարցազրույցում հավաստիացրեց, թե դռնփակ խոսակցությունն անցկացվում է բացառապես զրույցների դյուրացման նպատակով: Սակայն դժվար է պատկերացնել, թե այդքան հայտնի եւ գերզբաղված գործիչները մի քանի օրով բոլոր գործերից կտրվում են առանց գործնական նպատակիՙ պարզապես միմյանց հետ լավ շփվելու համար: Դրեզդենյան ներկայիս հանդիպման բոլոր 130 մասնակիցները հույժ կարեւոր անձինք են: Նրանց թվում է Հենրի Քիսինջերը: Բիլդերբերգյան ակումբի նիստերին անպայման մասնակցում են նաեւ Դեյվիդ եւ Նելսոն Ռոկֆելլերները, Զբիգնեւ Բժեզինսկին, Ալան Գրինսփենը եւ ամերիկյան քաղաքականության, ֆինանսների, տնտեսության մյուս խոշոր դեմքերը: «Dresdener Neuste Nachrichten» թերթը հաղորդում է, որ դրեզդենյան կոնֆերանսին մասնակցել է Նիդերլանդների թագավոր Վիլլեմ-Ալեքսանդերը:
Դրեզդենում վերջին օրերին կարելի էր տեսնել գերմանական խոշորագույն կոնցեռների (Siemens, Springer, Airbus…) ղեկավարներին: Հանդիպմանը մասնակցում էր նաեւ գերմանական արդյունաբերության միավորման ղեկավար Ուլրիխ Գրիլլոն: Դաշնային կառավարությունը «գործուղել» էր նույնիսկ երեք նախարարների. դրանք են ֆինանսների, պաշտպանության եւ ՆԳ նախարարներ Վոլֆգանգ Շոյբլեն, Ուրսուլա ֆոն դեր Լյայենը եւ Թոմաս դե Մեզյերը:
Դրեզդենի կոնֆերանսն ավարտվել է հունիսի 12-ին: Ընտրյալների ակումբը հետաքրքրվում է աշխարհի բոլոր կարեւորագույն գործերով: Գերմանական «Handelsblatt» թերթի տեղեկությունների համաձայն, Բիլդերբերգյան ակումբի 2016 թ. հանդիպման թեմաները եղել են միգրացիոն ճգնաժամը, ԱՄՆ նախագահական ընտրությունները, էներգիայի եւ հումքի գները, համացանցի անվտանգությունը, Չինաստանը, Ռուսաստանը, Մերձավոր Արեւելքը:
