AIWA-Ն ՆՇՈՒՄ Է ԻՐ 25-ԱՄՅԱԿԸ

Հ. Ծ.

«Կապ հաստատիր, ներգրավիր եւ առաջնորդիր» նշանաբանով գործունեություն ծավալող «Ամերիկայի Հայ կանանց միջազգային ասոցիացիան» (AIWA) հոկտեմբերի 1-ին Քեմբրիջի (Մասաչուսեթս) Չարլզ հյուրանոցում նշում է իր հիմնադրման 25-ամյակը: Սոցիալ-տնտեսական եւ անհատական նախաձեռնություններին միշտ աջակից կազմակերպությունը աշխարհի տարբեր անկյուններում գտնվող հայ կանանց խրախուսել է ամենատարբեր ծրագրեր իրականացնելու միջոցով: Ճաշկերույթ-պարահանդեսային միջոցառումը, ըստ «Արմինյն Միրոր-Սփեքթեյթր» շաբաթաթերթի հայտարարության, վարելու է Ռոդ Այլենդից կոնգրեսի ներկայացուցիչների պալատի պատգամավոր Քեթրին Ղազարյանը: Ելույթ է ունենալու Մ. Նահանգներում ՀՀ դեսպան Գրիգոր Հովհաննիսյանը: Երեկոյի ընթացքում մրցանակների են արժանանալու կառավարման եւ հանրային ծառայությունների գծովՙ Սելինա Օզուզուն Դողանը (իրավաբան, Թուրքիայի խորհրդարանի պատգամավոր), տոկունության եւ հաստատակամության գծովՙ Հուրի Գեբեշյանը (Հայաստանը Օլիմպիական խաղերին ներկայացնող ամերիկահայ առաջին մարզուհին), նորարարական կենսունակության գծովՙ Քերոլին Գ. Մուգարը (հիմնադիր եւ գործադիր տնօրեն Հայաստանում ծառատնկման ծրագրի), ձեռնարկատիրական աշխատանքների գծովՙ Քերոլին Ռաֆայելյանը («Ալեքս եւ Անի» հիմնարկի հիմնադիր եւ գործադիր տնօրեն) եւ արվեստի ու գիտությունների գծովՙ Քեթրին Սարաֆյանը («Փիքսար» անիմացիոն ստուդիաների պրոդյուսեր):