Անգլիական նոր ուղեցույց գինեգործության մասին
Զբոսաշրջության բնագավառում զարգացող նոր ճյուղ է գինիներ համտեսելու համար ճանապահորդելը: Կովկասյան տարածաշրջանում երեք ամիս անցկացնելով դոկտ. Մեթյու Հորկին եւ Շարին Թանը մանրամասն ուսումնասիրել են Հայաստանում, Վրաստանում եւ Թուրքիայում արտադրվող գինու տեսակները, խորամուխ եղել տարածաշրջանի, որպես գինեգործության օրրանի, պատմությանը, զրուցել մարդկանց հետ եւ հետաքրքրական տվյալներ ու նույնիսկ անեկդոտներ հավաքել, որպեսզի լույս ընծայեն «Խցանահանելով Կովկասը: Գինիներ Թուրքիայից, Հայաստանից եւ Վրաստանից» («Uncorking the Caucasus: Wines from Turkey, Armenia and Georgia») հատոր-ուղեցույցը:
«Նման գիրք գրելու միտքը ծագեց այն փաստից, որ եղած գրականությունը կա՛մ չափազանց ընդհանուր էր, կա՛մ էլ չափազանց մասնագիտական: Մենք ցանկացանք հանրամատչելի լեզվով ներկայացնել այդ բնագավառը եւ դրանով զարկ տալ գինիներ համտեսելու նպատակով ճանապարհորդությանը: Ուզում ենք, որ մարդիկ ինքնակամ որոշեն հայտնաբերելու այդ երկրները եւ այնտեղ արտադրված գինիները», նշել է դոկտ. Հորկին գրքի շնորհանդեսի ժամանակ, որը վերջերս է կայացել Երեւանում:
