Սեպտեմբերի 28-ից հոկտեմբերի 2-ը ամերիկյան հեղինակավոր Վուդսթոք կինոփառատոնում (Նյու Յորք նահանգ) «Լավագույն պատմողական խաղարկային ֆիլմ» մրցանակին եւ լավագույն օպերատորական աշխատանքի համար նախատեսված պարգեւին արժանացել է «Ամերիկացի» կինոնկարը (Հայաստան, 2021, բեմադրիչ՝ Մայքլ Գուրջյան, արտադրիչ՝ Արման Նշանյան): Մրցանակաբաշխության ժամանակ ամերիկահայ բեմադրիչն ասել է. «Շնորհակալությո՛ւն, Վո՛ւդսթոք՝ Հայաստանը համաշխարհային կինոյում ընդգրկելու համար»:
Փառատոնի ժյուրին մրցանակի տրման պաշտոնական հաղորդագրության մեջ գրել է. «Ամերիկացին» հազվադեպ պատմվող մի սփյուռքի պատմություն է: Եվ դրա մասին պատմությունը, որակը նույնքան հազվադեպ եւ ինքնատիպ են: Գեղեցիկ ձեւավորված, խաղացված, բեմադրված, իրականացված՝ այն պատմվում է այնպիսի նրբությամբ եւ նուրբ զգացմունքներով, որ դուք հասկանում եք, որ ձեր սպասածից ավելի եք հուզված: Դուք ապրումակցում եք այս կերպարներին, հաղորդակից դառնում նրանց թախծին եւ կապվում նրանց հետ անսպասելի ձեւերով: Սա հափշտակող ֆիլմ է, որը կապում է ձեզ ժամանակի, մշակույթի եւ ազգային պատկանելության հետ: Խորապես մարդկային է, հոգով լի եւ հստակորեն՝ խորապես անձնական: «Կյանքը հիասքանչ է» եւ «Հետնաբակի պատուհանը» շարժանկարների երանգներով՝ դուք հայտնվում եք միանգամայն յուրահատուկ աշխարհում: Ֆիլմը սկսվում է այնպիսի հմայքով եւ թվացյալ անմեղությամբ, իսկ վերջում այնքան համոզիչ է իր ընդհանուր մարդասիրության ուղերձով, որ դժվար է այն անվանել այլ կերպ, քան վարպետություն: Նիհիլիզմն ու ցինիզմը կարողանում են հեշտորեն հարմարվել այսօրվա աշխարհում, բայց «Ամերիկացին», չլինելով քաղցր-մեղցր եւ առանց որեւէ միամտության, հերքում է դրանք՝ խոնարհաբար, բերկրանքով եւ ինքնատիպորեն: Ի՜նչ անհավանական սխրանք է՝ այս ֆիլմը նկարահանել առանց դույզն-ինչ սխալ քայլի: Գեղեցիկ մշակված՝ յուրաքանչյուր մակարդակում եւ «նավարկելով» երեք լեզուներով: Մենք միաձայն գտանք, որ այս ֆիլմը պետք է արժանանա լավագույն պատմողական խաղարկային ֆիլմի մրցանակին»:
Բացի այդ, «Ամերիկացին» վերջերս Համբուրգի միջազգային կինոփառատոնում արժանացել է «Հանդիսատեսի համակրանք» մրցանակին:
2020-ի համավարակի ամիսներին Հայաստանում նկարահանված միմիայն հայաստանյան արտադրության «Ամերիկացի» շարժանկարը, որի ստեղծմանը մասնակցել են կինոգործիչներ Հայաստանից, ԱՄՆ-ից, Ռուսաստանից եւ Իսպանիայից, այս տարի բացեց «Ոսկե ծիրան» միջազգային կինոփառատոնը, որից հետո ցուցադրվեց Երեւանի կինոէկրաններին:
Ա. Բ.
