Արմավիրի մարզի Մրգաստան գյուղում շինարարական ակտիվ աշխատանքներ են սկսվել: Հիմքից կառուցվում է տունՙ տարիներ շարունակ 18 քմ մակերեսով վագոն-տնակում ապրող Հասոյանների ընտանիքի համար: Գործընկեր կառույցներիՙ ՎիվաՍել-ՄՏՍ-ի եւ «Հայաստանի Ֆուլեր տնաշինական կենտրոնի» աջակցությամբ մայիսից մեկնարկած աշխատանքներն արդեն տեսանելի արդյունք են տվել. տան պատերը կանգուն են, տանիքըՙ կառուցված:
Երեք ամիս առաջ Հասոյանները հուսալ անգամ չէին կարող, որ ամառը, ամեն տարվա պես, անցնելու է ոչ միայն բերք ու բարիք ստեղծելու, այլեւ իրենց երազանքների տունը կառուցելու հաճելի հոգսերի մեջ: Այսօր արդենՙ շինհրապարակում աշխատող կամավորների շնորհիվ նաեւ, լիահույս են, որ սեղմ ժամկետներում տանտեր են դառնալու: Մեծ թափովՙ մայթերի բետոնացում է կատարվում: Ներքին հարդարման աշխատանքներն էլ նախատեսված է ավարտել աշնանը:
18 քմ մակերեսով վագոն-տնակը եւ 8 տարվա դժվար հիշողությունները շուտով անցյալում կմնան:
«Իրականացվող ամեն ծրագիր որոշակի հաշվետվություն է պահանջում: Այն սովորաբար արտահայտվում է թվերով: Օրինակ, ասում ենքՙ տարիների ընթացքում, մեզ հաջողվել է 200 տան կառուցման մասին հայտարարել: Ավելի կարեւոր է, սակայն, այն հաշվետվությունը, որը մենք մեր հոգու խորքում ենք արձանագրում: Երբ ժպտացող աչքեր ենք տեսնում եւ զգում, որ դարձյալ մեկին հաջողվեց կյանքի հունի վերադարձնել ու ոգեւորել: Մարդասիրության եւ պատասխանատվության դրսեւորումն ամենացանկալի հաշվետվությունն են: Ուրախ եւ հպարտ եմՙ տարիների մեր գործընկերության արդյունքի համար»,-ասել ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Այս տարի բնակարանաշինության ծրագրի համար ՎիվաՍել-ՄՏՍ-ը հատկացրել է շուրջ 109 մլն ՀՀ դրամ: Դրա արդյունքում, բնակարանային աջակցություն է ստանալու 43 ընտանիք:
