Mediamax
Շիրակի եւ Տավուշի մարզերի բուժհաստատություններն արդեն իսկ ապահովված են անհրաժեշտ քանակի պաշտպանիչ դիմավահաններով, իսկ մյուս մարզերի խմբաքանակը պատրաստման ընթացքում է։ Պաշտպանիչ պարագաների այս արտադրությունը հանձն է առել «Արմաթ» տեխնոհամայնքըՙ ստանալով դրանք եռաչափ տպիչների օգնությամբ։
Արտադրական գործընթացի վերաբերյալ Մեդիամաքսը զրուցել է «Արմաթ» ինժեներական լաբորատորիաների ծրագրի ղեկավար Սեդրակ Վարդանյանի հետ։
Եռաչափ տպիչըՙ արտադրական սարք
Առաջատար տեխնոլոգիաների ձեռնարկությունների միության «Արմաթ» ինժեներական լաբորատորիաներում հեռավար ուսուցումը մեկնարկել է մարտի երկրորդ շաբաթից, սակայն դա չի խանգարում տեխնոհամայնքին հանդես գալ նոր նախաձեռնություններով եւ համատեղ աշխատանքով։
Սեդրակ Վարդանյանը պատմում էՙ համացանցում հանդիպել են եռաչափ տպիչների միջոցով դիմավահանների պատրաստման տեսանյութերի։ Միտք է առաջացել սեփական ուժերով սկսել արտադրական գործընթացՙ այդ կերպ օժանդակելով համավարակի դեմ պայքարին։
Լուսանկարը` Ջավախքին աջակցություն հիմնադրամի ֆեյսբուքյան էջից
«Առաջին փորձն արեց մեր գործընկեր «ՕգմենթԱր» ընկերությունը, որն «Արմաթ» լաբորատորիաներն ապահովում է 3D տպիչներով։ Քանի որ փորձը հաջող էր, մեկնարկեցինք դիմավահանների արտադրությունՙ Հայաստանի բոլոր մարզերի եւ Երեւանի բուժհաստատություններին տրամադրելու նպատակով»,- նշում է նա։
Մարզերի եւ Երեւանի բուժհաստատություններին
Ծրագրի ղեկավարի խոսքովՙ մշտական կապի մեջ են մարզպետարանների հետ, պարզել են յուրաքանչյուր մարզի բուժհաստատություններին անհրաժեշտ խմբաքանակն ու գործի անցել։
Ընդհանուր առմամբ պահանջվող քանակն այս պահին 1500 է։ Շիրակի եւ Տավուշի մարզերն արդեն իսկ ամբողջապես ապահովված են, Արմավիրի մարզն էլՙ դեռեւս մասամբ։
Լուսանկարը` «Արմաթ»
«Երեկ նաեւ տեղեկատվություն ստացաք, որ Արցախում եւս ցանկանում են որոշակի խմբաքանակ ունենալՙ կանխարգելիչ միջոցառումների համար։ Այժմ ճշտում ենք պահանջարկը»,- հավելում է Սեդրակ Վարդանյանը։
Աշխատանք տնից
«Իհարկե, մեր խմբակների սաներից շատերն էին պատրաստ նման աշխատանք կատարել, սակայն անվտանգության նկատառումներով որոշեցինք երեխաներին չներգրավել։ Եռաչափ տպիչները տեղափոխել ենք խմբավարների տներՙ աշխատանքն անվտանգ կազմակերպելու համար»,- ասում է Սեդրակ Վարդանյանը։
Լուսանկարը` «Արմաթ»
Նրա խոսքովՙ բավականին բարդ է եղել հումք ձեռք բերելը, քանի որ արտակարգ դրության պայմաններում անհրաժեշտ խանութների գործունեությունը սահմանափակվել է։ Այնուամենայնիվ, մարզերում եւ Երեւանում ուժերի կենտրոնացմամբ կարողացել են հայթայթել անհրաժեշտ հումքը։
Դիմավահանները բազմակի օգտագործման են, պատրաստված են պլաստիկից։ Դրանց ախտահանումն իրականացնում են բուժհաստատությունները։
Լուսանկարը` «Արմաթ»
«Այս պաշտպանիչ պարագաները նախատեսված են բուժանձնակազմի այն անդամների համար, որոնք անմիջական շփում ունեն վարակակիրների կամ ախտանիշներ ունեցող պացիենտների հետ։ Ախտանիշներ ունենալու դեպքում մարդիկ դիմում են պոլիկլինիկաներ, այդ պատճառով պոլիկլինիկաների համապատասխան աշխատակիցներին եւս տրամադրվում են դիմավահաններ»,- նշում է Սեդրակ Վարդանյանը։
Լուսանկարը` «Արմաթ»
Նրա խոսքովՙ պահանջարկ լինելու դեպքում կարող են օրական ավելի քան 1 000 դիմավահան արտադրել։
