Հայաստանին Թեհրան են հրավիրել ու մերժե՞լ է

Գերմանական «Դոյչլանդֆունկը» հուլիսի 20-ի համաշխարհային մամուլի տեսության մեջ ընդգրկել է Լոնդոնում լույս տեսնող արաբական SHARQ AL-AWSAT («Միջին Արեւելք») թերթի անդրադարձը Թեհրանում կայացած եռակողմ հանդիպմանը։ «Թեհրանի եւ Մոսկվայի համար այս գագաթաժողովն առաջին հերթին աշխարհին ցույց է տալիս, որ իրենք մեկուսացված չեն։ Այդ պատճառով նրանք հրավիրել են նաեւ Թուրքիայի նախագահին։ Վերջինս ՆԱՏՕ-ի անդամ է, Ծոցի երկրների եւ Իսրայելի հետ իր հարաբերություններն ընդլայնել է եւ առճակատում չի կամենում։ Էրդողանն առաջին հերթին ուզում է իր երկրի տնտեսական ծանր վիճակը բարելավել։ Թեհրանի ռեժիմը գագաթաժողովին մասնակցելու անհաջող փորձ է արել այնպիսի երկրների, ինչպիսիք Հնդկաստանն ու Հայաստանն են։ Բացի այդ, Թեհրանը Չինաստանի հետ իր հարաբերությունների մասին լիովին ուռճացրած պատկերացում է ունեցել։ Ամեն բան վկայում է, որ Թեհրանի գագաթաժողովն ամենից առաջ ցուցադրական միջոցառում է», կարծիք է հայտնում «Շարք ալ Աուսաթ» թերթը։

ԱՆԱՀԻՏ ՀՈՎՍԵՓՅԱՆ

Գերմանիա