Իսրայելի հայ համայնքն ու հայկական կազմակերպությունները բողոքի ակցիա են կազմակերպել` կապված այն փաստի հետ, որ միջազգային պաշտպանական էլեկտրոնային Elbit Systems ընկերությունն իր արտադրած զենքերը ինտենսիվորեն մատակարարում է Ադրբեջանին: Այս մասին գրում է «Արցախպրեսը»` հղում անելով Լոս Անջելեսի Asbarez-ին:
Իսրայելը մատակարարում է Ադրբեջանի ռազմամթերքի 60 տոկոսը, այդ թվում եւ անօդաչու թռչող սարքերն ու կլաստերային ռումբերը, որոնք արգելված են մոտ 100 երկրի կողմից: Արցախյան վերջին պատերազմի ընթացքում Ադրբեջանն օգտագործում էր իսրայելական զենքերն անմեղ քաղաքացիական բնակչության, այդ թվում եւ կանանց ու երեխաների, տարեցների, ինչպես նաեւ հիվանդանոցների ու եկեղեցիների դեմ:
Ներկայում Իսրայելի պաշտպանական արդյունաբերությունը զենքի վաճառքի մեկ այլ համաձայնագրի շուրջ քննարկումներ է իրականացնում Ադրբեջանի հետ, ինչին ի պատասխան տեղի հայկական համայնքն իր բողոքի ձայնն է բարձրացրել:
Հավաքվելով Elbit Systems ընկերության դիմացՙ համայնքի անդամները պահանջել են Իսրայելի կառավարությունից դադարեցնել զենքի մատակարարումն Ադրբեջանի բռնատիրական ռեժիմին: Հայերը հիշեցրել են, որ Ադրբեջանում աճող իսլամիստական ֆունդամենտալիզմի եւ ազգային փոքրամասնությունների նկատմամբ անհանդուրժողականության պայմաններում այդ երկիրը չի կարող վստահելի դաշնակից լինել Իսրայելի համար:
